Aqmola oblysynda kún ysyǵaly 30 orman órti tirkelgen
Veomstvonyń málimetinshe, keńeste aımaq basshysy Ermek Marjyqpaev, aýdan ákimderi men memlekettik organdardyń basshylary Abaı oblysynda qaza tapqan ormanshylardy bir mınýt únsizdikpen eske aldy.
Keńeste orman jáne dala órtin aldyn alý jáne olardy der kezinde sóndirý máselesi qaralyp, talqylandy. Aımaq basshysy órttiń shyǵý sebebi, adamnyń ómiri men densaýlyǵyna, tabıǵat pen janýarlar dúnıesine keltiriletin zııany, ekonomıkalyq shyǵyny jaıynda sóz qozǵady.
Oblystyq TJD bastyǵy Nurlan Atyǵaevtyń aıtýynsha, órt qaýipti kezeń bastalǵaly 31 orman jáne 1 dala órti, sondaı-aq, 18 shóp órti tirkelgen.
«Bıylǵy jyly órt qaýipti kezeńine 230 tehnıka, 3 órt-sorǵy stantsııasy, 231 rıýkzakty órt sóndirgish, 82 motopompa jáne 1130 shapqysh ázirlendi. Órt qaýipsizdigi talaptaryn saqtaý maqsatynda 214 adamnan turatyn 56 mobıldi top quryldy», - dedi Nurlan Atyǵaev.
Keńes barysynda «Býrabaı» memlekettik ulttyq tabıǵı parki aýmaǵynda qoldanylatyn erte satydaǵy órt jáne tútin oshaqtaryn erte anyqtaý ádisiniń tıimdiligi atap ótildi. Osyǵan uqsas qondyrǵy «Kókshetaý» memlekettik ulttyq tabıǵı parkinde de paıdalanylatyn bolady.
Osy rette, oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Rýslan Áýbákirov atap ótkendeı, Aqmola orman qorynyń aýdany 1,1 mıllıon gektardy quraıdy.
«Órt qaýpi kezeńi bastalar aldynda orman sharýashylyǵy mekemeleriniń osy maýsymǵa daıyndyǵyna tekserý júrgizildi. Materıaldyq-tehnıkalyq bazasyn jaraqtandyrý úshin 2021 jyly jergilikti bıýdjet esebinen jalpy somasy 290 mıllıon teńgege 23 tehnıka satyp alynsa, 2022 jyly 300 mıllıon teńgege 22 tehnıka satyp alyndy. Bıylǵy jyly jabdyqpen tehnıka satyp alýǵa bıýdjettik ótinimder taǵy jiberildi. Órt qaýpi joǵary maýsym bastalardan buryn 10 myń gektardan astam alqapta shópti ósimdikterdi joıý jumystary júrgizildi. Orman órtin boldyrmaý maqsatynda uzyndyǵy 12,5 shaqyrym mıneraldanǵan jolaqtar ornatyldy», - dedi Rýslan Áýbákirov.
Keńesti qorytyndylaǵan aımaq basshysy jergilikti atqarýshy organdardyń erikti órtke qarsy quralymdary men órt sóndirý beketteriniń daıyndyǵyn qaıta tekserý boıynsha arnaıy jumys tobyn qurýdy, órt tehnıkasymen jáne múkámmalmen nashar jabdyqtalǵan ormanshylyqtarǵa erekshe nazar aýdarýdy, tabıǵı órtterdi, orman sharýashylyqtarynyń shtattyq jáne maýsymdyq qyzmetkerlerin sóndirý boıynsha oqý-jattyǵýlar ótkizýdi, órtti qaýipsiz sóndirý úshin qajetti kıim-keshekpen qamtamasyz etýdi tapsyrdy.
Aıta ketsek, budan buryn órtengen ormandy qalaı qalpyna keltirýge bolatyndyǵy jaıynda mamannyń pikirin jarııalaǵan edik.
