Aqmola oblysynda qoıdyń júni, attyń jaly men saz balshyqtan salynǵan mazar bar

KÓKShETAÝ. QazAqparat- «Týǵan jer» arnaıy jobasynyń aıasynda Aqmola oblysy ishki saıasat basqarmasynyń Óńirlik kommýnıkatsııalar qyzmeti oblystaǵy eń tanymal tarıhı eskertkishtermen tanystyrýda. Sonyń biri Qorǵaljyn aýdanynyń Abaı aýylynda ornalasqan Bespaqyr mazary, dep habarlaıdy QazAqparat tilshisi.

Nura ózeniniń oń jaǵalaýynda ornalasqan Bespaqyr mazary alǵash ret otyz jyl buryn zerttelgen. Mazar XIX ǵasyrdyń 30-shy jyldarynda, Kenesary atymen baılanysty, jaýgershilik zamanda qaıtys bolǵan bes kisige salynǵan degen ańyz bar. Mólsheri 30h23h10 sm jáne 50h10 sm shıki óńdelgen kirpishten qalanǵan. Mazar salynǵan kirpish quramy - qoıdyń súti, júni, attyń jaly men saz balshyqtan turady. Kúmbeziniń ústińgi bóligi opyrylǵan, ishine kire beris qaqpasynyń jan-jaǵyndaǵy qabyrǵada buzylǵan jerleri bar.

Saǵanaq túrinde oryndalǵan mazardyń kúmbezdi esigi ózgeshilik úlgisin sıpattaıdy. Eki bólmeli kompozıtsııa kóldeneń ortasynda, shyǵystan batysqa qaraı sozylǵan. Shyǵys jaǵynda alasa darbaza (arka) jáne shyǵyńqy kirpishten qalanǵan kúmbezben jabylǵan esik bar, dıametri 2,8 metrdi quraıdy.