Aqmola oblysynda kovıdke qarsy vaktsına alǵan turǵyndardyń sany artty

KÓKShETAÝ. QazAqparat - Aqmola oblysynda 364 846 adam kovıdke qarsy vaktsınanyń birinshi komponentin aldy, bul - jalpy óńir halqynyń 46,5 paıyzy. Bul týraly Aqmola oblystyq sanıtarlyq-epıdemıologııalyq baqylaý departamentiniń basshysy Aınagúl Mýsına málimet etti, dep habarlaıdy QazAqparat tilshisi.

Óńirdiń bas memlekettik sanıtarlyq dárigeriniń aıtýynsha, koronavırýs ınfektsııasyna qarsy vaktsına alatyndardyń qatarynda 12-den 17 jasqa deıingi jasóspirimder, júkti áıelder – júktiliktiń 16 -dan 37-shi aptasyna deıin, laktatsııa kezeńindegi áıelder-bosanǵannan keıingi kezeń aıaqtalǵannan keıin (42 kúnnen keıin) 2 jasqa tolǵanǵa deıin, sondaı-aq birinshi, ekinshi jáne úshinshi toptaǵy múmkindigi shekteýli jandar bar.

«2021 jyldyń aqpan aıynan bastap aımaqta Aqmola oblysynda 364846 adam kovıdke qarsy vaktsınanyń birinshi komponentin aldy, bul - óńir halqynyń 46,5 paıyzy. Al ekinshi komponentin alǵandary sany 353 027 adamdy nemese oblys halqynyń 48,1 paıyzyn qurady», - dedi Aınagúl Mýsına.

Búgingi tańda oblysta QazVac, Vero Cell, V spýtnıgi jáne Comirnaty Pfizer vaktsınalarymen revaktsınatsııadan ótý múmkindigi bar.

«Aqmola oblysynda Comirnaty Pfizer vaktsınasynyń birinshi komponentin 17 599 adam nemese tıisti halyqtyń 26,6 paıyzy aldy, onyń ishinde 348 júkti, 3267 bala emizetin áıel, 9 779 jasóspirim bar. Bul vaktsınanyń ekinshi dozasyn 16 964 (25,7 paıyz) aldy. Al, jalpy, revaktsınatsııadan ótkender sany 220 myń adamdy qurady. Vaktsınaǵa jaǵymsyz reaktsııalar tirkelmegen», - dep túıindedi Aınagúl Mýsına.

Aıta ketsek, Aqmola oblysynda Tserber koronavırýsynyń jańa shtammy anyqtaldy.