Aqmola oblysynda koronavırýstyń mýtatsııalanǵan shtamy anyqtaldy
KÓKShETAÝ. QazAqparat – Aqmola oblysynyń bas memlekettik sanıtarlyq dárigeri Aınagúl Mýsına turǵyndardy bosańsymaýǵa jáne barlyq sanıtarlyq normalardy saqtaýǵa shaqyrdy, dep habarlaıdy QazAqparat tilshisi.
«Aqmola oblysynyń aımaqtary boıynsha aıtar bolsaq: «qyzyl» aımaqta Kókshetaý, Shortandy, Astrahan aýdandary jáne Birjan sal aýdany, «sary» aımaqta - Stepnogor, Aqkól, Arshaly, Býrabaı, Esil, Qorǵaljyn jáne Zerendi aýdandary, «jasyl» aımaqta - qalǵan barlyq aýdandar», - dep aıtty A.Mýsına.
Onyń aıtýynsha, Arshaly, Tselınograd, Shortandy jáne Aqkól aýdandarynda aýrýdyń ósý úrdisi baıqalady. Bul «qyzyl» aımaqtaǵy Nur-Sultan qalasyna halyqtyń kúndelikti qatynaýymen baılanysty.
Máselen, 31 naýryzdaǵy jaǵdaı boıynsha oblysta COVID-19 zerthanalyq rastalǵan 15370 jaǵdaı tirkelgen, onyń 104-i ólimge ushyraǵan. Sońǵy táýlikte COVID-19 zerthanalyq rastalǵan 48 jaǵdaı tirkeldi, onyń ishinde 36 belgileri bar jáne 12 belgileri joq.
«QR-da vırýstyń jańa shtamdarynyń paıda bolýyna baılanysty KVI-diń aınalymdaǵy shtammdaryna zertteýler júrgizilýde. Dúnıejúzilik densaýlyq saqtaý uıymymen birlesip COVID-19 shtammdaryn anyqtaýǵa ekspress-PTR-skrınıngtiń jańa ádistemesi engizildi. Densaýlyq saqtaý mınıstrligi shtammdarǵa zertteý júrgizdi jáne elimizdiń barlyq óńirleri boıynsha KVI naýqastarynan synamalar alyndy. Aqmola oblysynda zerttelgen 10 synamanyń ishinen bir naýqasta oń nátıje anyqtaldy.
Zertteý nátıjeleri boıynsha «brıtandyq», «Ońtústik Afrıka», «brazılııalyq» shtamdarǵa tán mýtatsııa yqtımaldyǵy anyqtaldy. Mýtatsııanyń bolýyn jáne onyń osy shtamdardyń birine jatatynyn túpkilikti rastaý bir aı ishinde aıqyndalatyn bolady. KVI - diń mýtatsııamen aldyn-alý jáne emdeý qazirgi kezdegi tásilderge uqsas», - dep túsindirdi bas dáriger.
Sonymen qatar, A.Mýsına aqmolalyqtar men oblys qonaqtaryn «jasyl» aımaqta bolǵanyna qaramastan bosańsymaýǵa shaqyrdy.
