Aqmola oblysynda koronavırýstan kóz jumǵan adamnyń ókpesi qabynǵan
NUR-SULTAN. QazAqparat – Aqmola oblysynda koronavırýstan taǵy bir adam kóz jumdy.
Bul týraly Aqmola oblysyndaǵy koronavırýs indeti boıynsha ótken onlaın brıfıngte Aqmola oblystyq densaýlyq saqtaý basqarmasynyń basshysy Súlen Іlııasov aıtty, dep habarlaıdy QazAqparat.
«Aqmola oblysynda 13 sáýirdegi jaǵdaı boıynsha koronavırýstan taǵy bir adam kóz jumdy. Jalpy alǵanda óńirde 71 adam koronavırýspen aýyrsa, onyń ishinde tórteýi qaıtys boldy», - deıdi Súlen Іlııasov.
Onyń aıtýynsha, qaıtys bolǵan 1936 jyly týǵan er adam.
«Ol áleýmettik qyzmet kórsetý ortalyǵynyń qamqorlyǵyndaǵy adam. 5 sáýirden bastap ol Kókshetaýdaǵy temirjol aýrýhanasyndaǵy provızorlyq statsıonarda karantınde bolǵan. 9 sáýirde dıagnozy anyqtalyp, Aqmola oblystyq týberkýlezge qarsy dıspanserdiń juqpaly aýrýlar bólimine aýystyrylǵan. Aýrýhanaǵa túsken kezde jaǵdaıy aýyr bolǵan. Dıagnozy ekijaqty ókpeniń qabynýy, óte aýyr deńgeıde. Qosalqy dertteri: arterıaldy gıpertonııa, júrektiń ıshemııalyq aýrýy», - deıdi ol.
Statsıonarda 347 naýqas jatyr. Conyń ishinde juqpaly aýrýlar bóliminde - 67, pravızorlyq statsıonarda - 184, karantın bóliminde 96 adam jatyr. Úı jaǵdaıyndaǵy karantınde – 662 adam bar.
