Aqmola oblysynda koronavırýstan qaıtys bolǵan adamǵa qatysty derekter belgili boldy
NUR-SULTAN. QazAqparat – Aqmola oblysy Densaýlyq saqtaý basqarmasynyń basshysy Súlen Іlıasov koronavırýs indetinen qaıtys bolǵan Tselınograd aýdanynyń turǵyny týraly derekterdi aıtty, dep habarlaıdy QazAqparat tilshisi.
Belgili bolǵandaı, 73 jastaǵy qart adamnyń birneshe sozymaly aýrýy bolǵan. Ol 2 sáýir kúni qaıtys boldy. Naýqastyń koronavırýsqa shaldyqqany týraly sot-medıtsınalyq saraptamadan keıin anyqtaldy.
Qaıtys bolǵan 1947 jylǵy er adam — Tselınograd aýdanynyń turǵyny. Buǵan deıin dıstsırkýlıatorlyq entsefalopatııa dıagnozymen tirkeýde turǵan.
Basqarma basshysynyń sózine qaraǵanda, bıyl 1 naýryzda naýqastyń kóp aǵzalyq dertine baılanysty jaǵdaıy nasharlaǵan. Bul rette tynys alý, júrek-tamyr qyzmetiniń jetkiliksizdigi joǵarylap, kúretamyrlyq qysym deńgeıiniń joǵary bolǵany baıqaldy.
«2 sáýirde naýqastyń bıologııalyq ólimi tirkelip, onyń denesi sot-medıtsınalyq saraptama úshin Nur-Sultan qalasyna jetkizildi. Zertteý júrgizý kezindegi sektsıondyq materıalda COVID-19 anyqtaldy. Naýqas bolǵan jerde epıdemııaǵa qarsy sharalar júrgizilýde, sondaı-aq qarym-qatynasta bolǵan adamdar anyqtalýda», - dedi S. Іlıasov.
Budan buryn habarlanǵandaı, Aqmola oblysynda koronavırýs ınfektsııasynan bir adam qaıtys boldy.
