Aqmola oblysynda koronavırýsqa qarsy vaktsınany birinshi kezekte kimder alady
KÓKShETAÝ. QazAqparat – Bıylǵy jyldyń 1 aqpanynan bastap elimizde halyqtyń belgili bir toptaryna koronavırýs ınfektsııasyna qarsy vaktsına salý josparlanýda.
Osy rette, Aqmola oblysynda 2021 jyldyń sońyna deıin kezeń-kezeńmen barlyǵy 92 840 adamǵa vaktsına salynbaqshy, dep habarlaıdy QazAqparat tilshisi.
Aqmola oblysynyń bas memlekettik sanıtarlyq dárigeri Aınagúl Mýsınanyń aıtýynsha, birinshi kezeńde vaktsına juqpaly aýrýlar aýrýhanalarynyń, jedel medıtsınalyq járdemniń, jansaqtaý, bastapqy medıtsınalyq sanıtarlyq kómek bólimsheleriniń, aýrýhananyń qabyldaý bólmeleriniń, sanıtarlyq - epıdemıologııalyq qyzmettiń medıtsına qyzmetkerlerinen quralǵan 6 916 adamǵa salynatyn bolady.
Naýryzdan bastap ekinshi kezeń bastalady. Budan soń jalpy bilim beretin mektepter men ýnıversıtetterdiń muǵalimderi men oqytýshylaryna, vedomstvolyq medıtsına qyzmetterdiń qyzmetkerlerine (barlyǵy 62 611 adam) vaktsına salynady.
Sáýir aıynan bastap vaktsınany mektep-ınternattardyń, mektepke deıingi mekemelerdiń pedagogtary, stýdentter, sozylmaly aýrýlary bar adamdar – barlyǵy 10 368 adam ala bastaıdy.
«2021 jyldyń sońyna deıin kezeń-kezeńmen Aqmola oblysynyń 92 840 turǵynyna salynady. Osy rette, reseılik «Spýtnık V» vaktsınasy qoldanylady», – dedi Aınagúl Mýsına.
Óńirdiń bas memlekettik sanıtarlyq dárigeri atap ótkendeı, aqyly vaktsına salý boıynsha másele áli sheshilýde, ázirge vaktsınany aqyly túrde satyp alý múmkin emes. Óıtkeni, búgingi tańda Qazaqstanǵa táýekel tobyndaǵylarǵa tegin vaktsına salý úshin bir rettik ákelýge ruqsat etilgen.
