Aqmola oblysynda koronavırýs ınfektsııasynyń taralýy boıynsha jaǵdaı turaqty

Bul týraly brıfıngte oblystyq sanıtarlyq-epıdemıologııalyq baqylaý departamentiniń basshysy Aınagúl Mýsına aıtty, dep habarlaıdy QazAqparat tilshisi.

Vedomstvo basshysynyń sózinshe, 2021 jylǵy 23 aqpandaǵy jaǵdaı boıynsha bir táýliktiń ishinde 63 adamnan COVID-19 zerthana arqyly rastaldy. Onyń ishinde 27 adamda koronavırýs belgileri bar, 36 adamda vırýs belgileri joq. Koronavırýs ınfektsııasyna shaldyqqandar sanynyń táýliktik ósimi 0,5 paıyzdy qurap otyr. Aýdandar boıynsha alsaq, Kókshetaýda - 23, Býrabaıda-11, Esilde-7, Jaqsyda-5, Ereımentaýda-4,Sandyqtaýda-4, Tselınogradta-4, Birjan salda-4, Zerendide-1.

«2021 jyldyń 17-23 aqpan aralyǵynda COVID-19-dyń 517 jaǵdaıy tirkeldi, bul aldyńǵy aptamen (525 jaǵdaı) salystyrǵanda 1 ese az (8 jaǵdaıǵa az). Pandemııa bastalǵannan beri oblysta COVID-19 indetin juqtyrýdyń 13305 jaǵdaıy tirkelgen, onyń 8855-niń belgileri bar, 4450-niń belgileri joq. Jalpy, 6504 jaǵdaı (48,8%) azamattardyń óz erkimen qaralýǵa kelgen kezinde, 4864 jaǵdaı (36,5%) baılanys arqyly, 1937 jaǵdaı (14,5%) profılaktıkalyq skrınıng barysynda anyqtalyp otyr.

Aıta keteıik, Aqmola oblysynda koronavırýs ınfektsııasyna qarsy otandyq vaktsına salý jumystary júrgizilýde.