Aqmola oblysynda kópbalaly otbasylardyń úılerine ýytty gaz datchıkteri ornatylýda

KÓKShETAÝ. QazAqparat – Aqmola oblysynda turmysy tómen jáne kópbalaly otbasylardyń úılerine ýytty gaz ıisin anyqtaıtyn 1,3 myńnan astam qurylǵy ornatyldy. Bul týraly búgin Óńirlik kommýnıkatsııalar qyzmetinde ótken brıfıngte oblystyq Tótenshe jaǵdaılar departamentiniń basshysy Alekseı Sovetov aıtty, dep habarlaıdy QazAqparat tilshisi.

Brıfıngte oblys aýmaǵynda 2020-2021 jylǵy jylytý maýsymy kezinde jeke turǵyn úılerde oryn alatyn tótenshe jaǵdaılardyń aldyn alý baǵytynda qolǵa alynǵan sharalar aıtyldy.

«Oblys aýmaǵynda kópbalaly otbasylar men halyqtyń áleýmettik osal toptarynyń úılerine kómirtegi totyǵyn anyqtaıtyn - 1327 jáne 10 tútin detektory ornatyldy. Jyl sońyna deıin kómirtegi totyǵyn anyqtaıtyn taǵy 383 qurylyǵy ornatý josparlanyp otyr», – deıdi Alekseı Sovetov.

Jyl saıyn jylý berý maýsymy bastalysymen órt shyǵý qaýpi de arta túsedi. Adam ólimine ákep soqtyratyn tilsiz jaýdyń beleń alýyna negizinen mas kúıinde temeki tuqylyn durys sóndirmeý, otty abaısyz paıdalaný, pesh jáne elektr jelisi qurylǵylaryn qoldanǵan kezde órt qaýipsizdigi erejeleriniń durys saqtalmaýy sebep bolyp otyr.

«2020-2021 jylǵy jylytý maýsymyna daıyndyq jumystaryn pysyqtaý maqsatynda qyrkúıektiń 2-nen bastap, qazannyń 2-ne deıin órt qaýipsizdigi aılyǵy ótip jatyr. Aılyq sheńberinde ótken tekseris kezinde pesh, gaz ballony men elektr jelisine qatysty 2605 órt qaýipsizdigi talaptarynyń buzylǵany anyqtaldy. Sondyqtan, aldaǵy ýaqytta da bizdiń departament tarapynan qalalar men aýdandarda órt qaýipsizdiginiń aldyn alý maqsatyndaǵy josparly keshendik jumystar júrgizile beredi», – dep tolyqtyrdy departament basshysy.