Aqmola oblysynda kombaın men traktor óndirisi eselep artyp otyr

ASTANA. QazAqparat – Aqmola oblysy sońǵy úsh jyl boıy áleýmettik-ekonomıkalyq damýdyń negizgi kórsetkishterin oryndaý boıynsha aldyńǵy qatarda. Bul týraly óńir ákimi Ermek Marjyqpaev aıtty, dep habarlaıdy QazAqparat tilshisi.

«Bıyl oblys ekonomıkasy áli de turaqty ekenin rastaǵym keledi. Ótken jyly jaqsy qarqyn alǵan salalar ósimdi jalǵastyryp jatyr. Jalpy sońǵy úsh jyl boıy eldegi óńirler bólinisinde biz áleýmettik-ekonomıkalyq damýdyń negizgi kórsetkishterin oryndaý boıynsha aldyńǵy qatardamyz. Osylaısha, bıylǵy qańtar-aqpan aılarynda ónerkásip salasynda 558 mlrd teńgeden astam somaǵa ónim shyǵaryp, joǵary qarqynǵa qol jetkizdik. Ótken jylmen salystyrǵanda 15 paıyz ósim bar», - dedi oblys ákimi ortalyq kommýnıkatsııalar qyzmetinde ótken eseptik brıfıngte.

Onyń ishinde óńdeý ónerkásibinde óndiris ındeksi - 115,3%, taý-ken óndirý ındeksi - 122,6% quraǵan.

Ásirese, spıkerdiń aıtýynsha, metallýrgııa, mashına jasaý, azyq-túlik óndirisi syndy bazalyq salalarda ósim baıqalady.

«Ónim túrlerine kelsek, kombaın shyǵarý - 2,5 ese, traktor – 1,5 esege, óńdelmegen altyn – 37 paıyzǵa, suıyq maı men sary maı – 1,5 esege, et pen sorpalyq ónimder – 14 paıyzǵa artqan. Sonymen birge, 2022 jyly jańa óndiristik qýattardy engize otyryp, ónerkásiptik áleýetti ulǵaıtý arqyly da ósimge qol jetkizdik – 231 mlrd teńgege 163 joba iske asyryp, 3,5 myń jańa jumys ornyn qura aldyq», - dedi E. Marjyqpaev.