Aqmola oblysynda qola dáýiriniń jádigerleri tabyldy
KÓKShETAÝ. QazAqparat - Aqmola oblysynyń Zerendi aýdany aýmaǵynda keıingi qola dáýirine tán áshekeı zattar tabyldy, dep habarlaıdy QazAqparat tilshisi Aqmola oblystyq tarıhı-mádenı murany qorǵaý jáne paıdalaný ortalyǵy basshysynyń orynbasary Serik Ysqaqovqa silteme jasap.
S.Ysqaqovtyń aıtýynsha, qundy jádiger Aqmola oblystyq tarıhı-mádenı murany qorǵaý jáne paıdalaný ortalyǵy janynan qurylǵan oblystyq ekspedıtsııa tarıhı-mádenı mura obektilerine qorǵaý-qutqarý jumystary kezinde tabylǵan.
«Qazba jumystary barysynda b.z. deıingi 7-8 ǵasyr, qola dáýirine jatatyn dıametri 8 jáne 9 metr úsh qorǵanda júrgizildi. Onyń birinde 4 molanyń orny tabyldy. Bul molalardyń úsheýi jalǵan, bos bolyp shyqty. Al, bireýinde eki altyn jáne bir qola bilezik pen qoladan jasalǵan monshaq tabyldy. Keńótkel arheologııa eskertkishi №2 qabir shuńqyrynda 19 kúıgen aǵash qaldyqtaryn anyqtady (bul krematsııa rásimin sıpattaıdy), janýar súıekteriniń qaldyqtary, onyń ishinde óńdelgen (kúndelikti ómirde quraldar retinde paıdalanylǵan degen boljam bar).
Adam súıekteri sonymen qatar altyn buıym tabyldy. Qoladan jasalǵan bileziktiń syrty qalyńdyǵy 2 mm-den aspaıtyn altynmen qaptalǵan. Alynǵan materıalǵa súıene otyryp, bul jerde rýbasynyń áıelin jerlegen degen boljam bar. Sondaı-aq qysh ydystardyń synyqtary men fragmentter tabyldy. Tabylǵan zattar Aqmola oblystyq tarıhı-ólketaný murajaıyna tapsyryldy», - deıdi Serik Ysqaqov.
Sonymen qatar, ol arheologııalyq eskertkishterge qorǵaý-qutqarý jumystaryn júrgizý barysynda, tarıhty zerdeleý úshin qyzyqty, basqa da jádigerler tabylýy múmkin dep otyr.
Aıta keteıik, qola dáýiri - adamzat qoǵamyndaǵy tarıhı-mádenı kezeń. Ol qola metallýrgııasynyń keń qanat jaıyp, eńbek quraldary men qarý-jaraq jasaýǵa arnalǵan negizgi materıalǵa aınalýymen sıpattalady.
Atalmysh ekspedıtsııa maýsymnyń 4-i men shildeniń 4-i aralyǵynda ótkiziledi. Oǵan Sh.Ýálıhanov atyndaǵy Kókshetaý memlekettik ýnıversıteti men A.Myrzahmetov atyndaǵy Kókshetaý ýnıversıtetiniń stýdentteri jáne Kókshetaý tehnıkalyq ınstıtýtynyń kýrsanttary men 10-11 synyp oqýshylary qatysýda.
