Aqmola oblysynda kóktemgi sý tasqynynyń aldyn alýǵa 43 mln. teńgeden astam qarjy bólindi

Bul týraly óńirlik kommýnıkatsııalar qyzmetinde ótken brıfıngte Aqmola oblysy boıynsha TJD basshysy Alekeı Sovetov málim etti, dep habarlaıdy «QazAqparat» HAA tilshisi.

Departament basshysynyń aıtýynsha, oblystaǵy Atbasar, Sandyqtaý, Astrahan, Zerendi, Shortandy jáne Tselınograd aýdandarynda sý basý qaýpi bar. Osy maqsatta atalǵan aýdandar arqyly ótetin Koko, Jabaı, Saryqamys, Talqara, Jylandy, Esil, Qylshaqty, Kolýton, Shaǵalaly, Nura, Qaıraqty, Qyzyl sý, Jolboldy jáne Baqsuq ózenderi baqylaýǵa alynatyn bolady.

«Oblystyq bıýdjet  esebinen bólinip otyrǵan 43 mıllıon teńgeden astam qarjyǵa óńirdegi qaýipti aımaqtar tikushaqpen baqylanyp, ǵaryshtyq monıtorıngi qyzmetin alý, ózenderdiń arnalarynda jarý jumystaryn júrgizý sııaqty jáne ózge de sharalar júzege asyrylatyn bolady», dedi A.Sovetov.

Sonymen qatar, departament basshysy tótenshe jaǵdaılardy aldyn alý men joıý sharalary boıynsha qalalyq jáne aýdandyq ákimdiktermen 2017 jylǵa 100 mıllıon teńge kóleminde qarjy eskerilgen. Oblys qalalary men aýdandarynda 14 myń tonna ınertti materıaldar, 50 myń qap, 149 tonnadan astam janar-jaǵar materıaldary ázirlengenin atap ótti.

«Tótenshe jaǵdaılarǵa jedel túrde eleý maqsatynda azamattyq qorǵanys organdarynyń, ishki ister jáne áskerı bólimderiniń jeke quramynan 605 adam men arnaıy quraldary, odan basqa da 105 birlik tehnıka men 10 birlik júzý quraldary jumyldyrylady»,- dedi A.Sovetov.

Oǵan qosa, departament jol qyzmetterimen birlese otyryp, oblys avtojoldary men sý ótkizý nysandarynyń daıarlyǵyn tekserýde.Tasqyn merzimine daıyndyq maqsatynda TJ boıynsha Departamenttiń aýdandyq bólimderi reıdtik sharalar uıymdastyrdy. Sondaı-aq halyq arasynda jeke qonystardy sý basýǵa jol bermeý boıynsha jáne olardyń aldyn alý týraly nasıhat jumysy júrgizilip jatyr.