Aqmola oblysynda kóktemgi sý tasqynyn aldyn alý sharalary pysyqtaldy (FOTO)
KÓKShETAÝ. QazAqparat - Tselınograd aýdanynyń Aqmol aýlynda oblys ákiminiń orynbasary Q.Otarov tóraǵalyǵymen aýdan ákimderi, oblystyq departamentter, basqarmalar jáne vedomstvonyń basshylarynyń qatysýymen óńirde kóktemgi sý tasqynyn boldyrmaý maqsatynda keńeıtilgen májilis ótti.
Májiliste Arshaly, Tselınograd jáne Qorǵaljyn aýdandarynyń ákimderi kóktemgi sý tasqynyn aldyn alý maqsatynda qolǵa alynǵan sharalar boıynsha esep berdi.
Osy rette Q.Otarov qaýipti aýmaqtardaǵy sý qoımalary men bógetterdi baqylaýǵa alýdy tapsyrdy. Oǵan qosa, qar sýy alyp qalýy múmkin eldimekender men joldardyń da qaýipsizdigi eskerildi.
Qazirgi kezde, qaýipti aımaqtardaǵy eldi-mekenderdiń kósheleri qardan tazartylyp, kúl-qoqystary syrtqa shyǵarylýda. Sondaı-aq, aryqtar men bógender, káriz júıesi tazalanyp retke keltirilýde.
Gıdrotehnıkalyq nysandarǵa qosymsha baqylaýshy-kezekshi qoıyldy. Sý tasqyny bastalar kezde oblystyq, aýdandyq jáne qalalyq jedel shtab táýlik boıy jumys isteıdi.
Qaýipti eldi-mekenderde zardap shekkenderdi ornalastyrý úshin mektep ǵımaratynda arnaıy oryn ázirlense, medıtsınalyq mekemeler qajetti dári-dármekpen qamtamasyz etildi.
Osy kúni májiliske qatysýshylar Tselınograd aýdanyndaǵy sý tasqyny qaýpi bar Talapker, Vozdvıjenka, Razdolnoe jáne Orazaq aýylyndaryn aralap kórdi. Sondaı-aq, Aqmol aýlynda uıymdastyrylǵan arnaıy tehnıkalardyń kórmesin tamashalady.
