Aqmola oblysynda kóktemgi sý tasqyny qaýip-qateriniń aldyn alý sharalary júrgizilýde
KÓKShETAÝ. QazAqparat - Aqmola oblysynda kóktemgi sý tasqyny qaýip-qateriniń aldyn alý boıynsha daıyndyq sharalary júrgizilip jatyr. Oǵan barlyq múddeli memlekettik organdar men uıymdar jumyldyrylǵan, dep habarlaıdy QazAqparat oblystyq ishki saıasat basqarmasyna silteme jasap.
Óńirdiń Tótenshe jaǵdaılar departamentiniń málimetinshe, bıylǵy kóktemgi sý tasqyny qateriniń aldyn alý jumystary ótken jyly jazda bastaldy.
«Óńirlerdiń ákimdikteri 43 eldi mekende uzyndyǵy 47,1 shaqyrym sý burý arnalaryn ornatý, 5,2 shaqyrym topyraq úıilgen bógetterdi nyǵaıtý, 4,8 shaqyrym topyraqtan bógetter salý, 24,4 shaqyrym ózen arnalaryn tazartý, 50 sý ótkizý qurylystaryn ornatý jáne jóndeý jumystaryn júrgizdi. Jaqynda 10 aýdanda muzdy qopsytý jáne jarý jumystary bastalady», - dedi vedomstvo basshysynyń orynbasary Qanat Dospaev.
Sý basý qaýpi joǵary aımaqtar sanalatyn Arshaly aýdanynda 9 eldi mekende sý tasqynyna qarsy is-sharalar ótkizildi. Eldi mekenderdi ınjenerlik qorǵaý is-sharalarynyń josparyna sáıkes, Esil ózeni arnasynyń boıynda ornalasqan Jibek joly jáne Túrgen aýyldaryndaǵy turǵyn úılerdiń aýlalaryna topyraqtan bógetter turǵyzý, jyralardy, sý ótkizý qurylystary men ózen arnalaryn ósimdikterden tazartý jumystary júrgiziledi.
Aýdanda sý tasqynynyń aldyn alýda eriktilermen belsendi kómek kórsetiledi, olar aýla aralaýlarynda taqyryptyq jadynamalar taratady, azamattardyń turýyn jáne yqtımal evakýatsııalyq is-sharalardy ótkizý úshin qolda bar úı janýarlarynyń sanyn naqtylaıdy. Kóktemgi sý tasqynynyń aldyn alý jumystary Tselınograd jáne Astrahan aýdandarynda da júrgizilýde.
Jalpy, qazirgi kezde Aqmola oblysyndaǵy eldi mekenderden barlyǵy 443,3 myń tekshe metrden astam qar kúreldi, sondaı-aq, 11,6 myń tonna ınertti materıal, 87,2 myń qaptar daıyndaldy, 1 myńnan astam arnaıy tehnıka tolyq daıyndyqqa keltirildi.
