Aqmola oblysynda qoǵam ókilderi azyq-túlik baǵasyn baqylaýǵa aldy
Vedomstvonyń málimetinshe, áleýmettik mańyzy bar azyq - túlik taýarlaryna baǵanyń negizsiz ósýine jol bermeý maqsatynda «Aqmola-Adaldyq alańy» jobalyq keńsesi Básekelestikti qorǵaý jáne damytý komıtetiniń aýmaqtyq departamentimen jáne «Jas Otan» jastar qanatynyń oblystyq fılıalymen birlesip Kókshetaý qalasynyń iri saýda ortalyqtary men bazarlarynda baǵa monıtorıngin júrgizdi.
«Monıtorıng barysynda jumys toby áleýmettik mańyzy zor azyq-túlik taýarlarynyń baǵasyn kóterip satqanyn anyqtady. Mysaly, Aǵymdaǵy jyldyń 1-shi toqsanynda kartoptyń 1 kg úshin shekti baǵa 96 teńge dep belgilendi. Alaıda, naýryzdyń 17-de qalanyń saýda nysandarynyń birinde kartop 130 teńgeden nemese shekti baǵasynan 35,42 paıyz qymbatqa satyldy. Taǵy bir saýda ortalyǵynda 1 kg úshin shekti baǵasy 211 teńge bola tura qant 220 teńgege satyldy. 1-shi sortty bıdaı unynyń da belgilengen baǵasynan 40,38 paıyzǵa qymbatqa satylǵany anyqtaldy. Al, taýyq jumyrtqasynyń on danasy 253 teńgeniń ornyna 385 teńgege satýǵa qoıylǵan», - deıdi vedomstvodan.
Monıtorıng qorytyndysy boıynsha taldaý anyqtamasy jasaldy, ol baǵany negizsiz kóterýge monopolııaǵa qarsy den qoıý sharalaryn qabyldaý úshin tıisti organdarǵa jiberildi. Tikeleı efır ótkizilip, júrgizilgen monıtorıng nátıjeleri aıtyldy, sondaı-aq, azamattardan kelip túsken saýaldarǵa jaýaptar berildi.
«Anyqtalǵandaı, elimizde qalyptasqan jaǵdaıǵa baılanysty áleýmettik mańyzy bar azyq- túlik taýarlaryna suranys joǵary. Ókinishke oraı, biz óńirdegi keıbir teris pıǵyldy kásipkerler tarapynan azyq-túlik baǵasynyń qymbattaýyna jol berilgen. Osyǵan baılanysty turǵyndardy dúrlikpeýge shaqyramyz. Áleýmettik mańyzy bar azyq-túlikterdiń baǵasy qatań baqylaýda bolady. Osy maqsatta volonterlerdi tarta otyryp, monıtorıngti turaqty túrde júrgizip otyramyz», - dep atap ótti «Aqmola-Adaldyq alańy» jobalyq keńsesiniń jetekshisi Samıra Táıtenova.
