Aqmola oblysynda kıikterden 76,9 myń gektar egistikke zııan kelgen

KÓKShETAÝ. QazAqparat – Aqmola oblysynyń dıqandary aqbókenniń kóptiginen qyrýar shyǵynǵa ushyraǵan. Eń kóp Egindikól, Atbasar, Jarqaıyń, Qorǵaljyn jáne Jaqsy aýdandaryndaǵy sharýalar zardap shegip otyr, dep habarlaıdy QazAqparat tilshisi.

Atbasar aýdanyndaǵy «Agromar Treıd» Magomed Dzeıtovtyń aıtýynsha, bıyl aqbóken byltyrǵydan da kóp. Sharýashylyqtyń 7 myńǵa jýyq gektar egistik alqabyn taptap, ádeýir shyǵyn keltirgen.

«Aqbekender burynnan bizdiń aýdanymyzda boldy. Alaıda, bıyl jyldaǵydan kóp. Adamnan, tehnıkadan qoryqpaıdy. Egistik qorǵaý úshin kúzetshi de qoıdyq, biraq nátıje joq. Bıyl kóktem, jaz aılarynda qurǵashylyq boldy, eginniń shyǵymy nashar. Ol azdaı aqbókender taptaýda. Qazir jabaıy janýardan keltirilgen shyǵyn kólemin eseptep jatyrmyz. Jalpy, shamamen 6-7 myń gektarda egistik alqapqa zııan keltirildi», - dep túsindirdi Magomed Dzeıtov.

Al, Jarqaıyń aýdanynda aqbókenderden 17 sharýashylyq zardap shekken. Aýdandyq aýyl sharýashylyǵy bóliminiń agronomy Murat Berlibekovtiń málimetinshe, jazda aýdanda aqbókenderdiń sany 120 myńǵa jetken.

«Bizdiń aýyl sharýashylyǵy taýaryn óndirýshiler «Ohotzooprom» óndiristik birlestiginiń qyzmetkerlerimen birlese otyryp, janýarlardy aýdan shekarasynan tys jerge shyǵarý jumystaryn júrgizdi. Alaıda, olardan daqyldardy qorǵaý múmkin bolmady.

«Búgingi tańda aýdanda aqbókender 17 sharýashylyq, barlyǵy 10 myń gektar egistigin taptady», - dedi Murat Berlibekov.

Osylaısha, kóktemgi egistik jumystaryna mıllıondaǵan ınvestıtsııa salǵan sharýalar úlken shyǵynǵa ushyrap otyr.

«Bizdiń sharýashylyq kúzde mol egin jınaý úshin barlyq agrotehnıkalyq sharalardy, ozyq tehnologııalardy qoldandy. Tek, osy aqbókendermen kúresýde qaýqarsyz boldyq. Mamyr aıynan bastap janýarlar kele bastady, bul úrdisti baqylaý múmkin emes. Táýlik boıyn kezekshilik ettik, bári bir qýyp úlgermedik. Saldarynan 5 myń gektar eginimiz búlindi. Biz úshin bul orasan zor shyǵyn, – dep bólisti Jarqaıyń aýdanyndaǵy «Rostov Agro» JShS-niń agronomy Oksana Istomına.

Jalpy, aımaq ákimdiginiń málimetinshe, bıyl Aqmola oblysynda aqbókenderden 76,9 myń gektar egistikke zııan kelgen. Eń úlken shyǵyn kólemi shamamen Egindikól aýdanynda 40 myń gektardan assa, Atbasar aýdanynda 17,4 myń gektar, Jarqaıyń aýdanynda 9,5 myń gektar, Qorǵaljyn aýdanynda 5,7 myń gektar jáne Jaqsy aýdanynda 3,7 myń gektardy quraıdy.