Aqmola oblysynda kıikter ashtan qyrylyp jatyr
KÓKShETAÝ. QazAqparat – Aqmola oblysynyń Qorǵaljyn jáne Tselınograd aýdany aýmaǵynda 30-dan astam kıiktiń óleksesi tabyldy, dep habarlaıdy QazAqparat tilshisi.
Aqmola oblys boıynsha orman sharýashylyǵy jáne janýarlar álemi aýmaqtyq ınspektsııasynyń basshysy Lashyntaı Dúısenovtyń aıtýynsha, bıylǵy jylǵy naýryzdyń 9-da «PO Ohotzooprom» respýblıkalyq memlekettik qazynalyq kásipornynyń ortalyq óńirlik fılıaly ınspektorlary Saýmal kólinen 10 shaqyrym aýmaqtan 14 kıiktiń óleksesin anyqtaǵan. Bul jaǵdaı Qorǵaljyn aýdandyq Polıtsııa bóliminde №211160030000107 málimetter tizilimi kitabynda tirkeldi. Sonymen birge, naýryzdyń 26-da Aqmol aýylynan 8-9 shaqyrym jerden 20 kıiktiń óleksesi tabyldy. Onyń 12-i teke, 8-i analyq kıikter.
«Tekseris barysynda kıikter qalyń qar men kúrdeli aýa raıynyń saldarynan shóp teýip jeı almaǵandyqtan ashtan qyrylǵany anyqtaldy. Janýarlardyń ólekseleri arnaıy mal qorymynda zalalsyzdandyryldy», - dedi Lashyntaı Dúısenov.
Sol sebepti, oryn alyp otyrǵan jaǵdaıǵa baılanysty jáne kıikterden jappaı qyrylýyn boldyrmaý úshin Aqmola oblysynyń mamandandyrylǵan tabıǵat qorǵaý prokýratýrasy oblystyq orman sharýashylyǵy jáne janýarlar álemi aýmaqtyq ınspektsııasyna Qorǵaljyn, Egindikól, Jaqsy jáne Atbasar aýdandarynyń ákimderine kıikter júretin aýmaqtardaǵy qardy kúreýdi uıymdastyrý týraly nusqaý berildi.
Eske sala keteıik, osynda birer kúni buryn jabaıy kıikter Aqmola oblysynyń Qorǵaljyn aýlyna kirip ketken bolatyn. Turǵyndar olarǵa jem-shóp bergen edi.
