Aqmola oblysynda Keń bıdaıyq aýylynyń turǵyndary qaýipsiz jerge kóshirildi - Tótenshe jaǵdaılar komıteti
ASTANA. QazAqparat - Aqmola oblysynda Qorǵaljyn aýdany Keń bıdaıyq aýylynyń turǵyndary qaýipsiz jerge kóshirildi. Bul týraly búgin brıfıngte QR IIM Tótenshe jaǵdaılar komıtetiniń resmı ókili Rýslan Imanqulov málim etti.
"Aýyldy sý basý qaýpi bar. Degenmen áli eshbir úıge sý kirgen joq. Aldyn ala 12 úıdiń turǵyndary jergilikti mektepke kóshirildi. Ýaqytsha bógen turǵyzylyp, 1 myńǵa tarta qum salynǵan qaptarmen qorshaý jasaldy", - dedi ol.
Onyń sózine qaraǵanda, bul jumystarǵa qutqarý bólimshelerinen, jergilikti atqarýshy organdarynan jáne ózge de uıymdardan 135 adam, 6 birlik tehnıka jáne 2 qaıyq tartyldy.
Jalpy qazir Aqmola oblysynda sý aıdyndarynyń jaı-kúıine úzdiksiz monıtorıng júrgizilýde. Qutqarý qurylymdarynyń kúshteri men quraldary joǵary ázirlik rejıminde tur.
"Tselınograd aýdanynyń Aǵanas aýylynda adamdar men azyq-túlikti tasymaldaý uıymdastyryldy. Jol tósemin qalpyna keltirý jumystary bastaldy. Aqmola oblysynyń qutqarýshylary táýlik boıy kezekshilik atqarýda.
Talapker aýylynda erigen qar sýyn sorý jumystary jalǵasýda. Barlyǵy 3 980 tekshe metr sý soryldy", - dedi R. Imanqulov.
