Aqmola oblysynda qazandyǵy jarylǵan mektepte shuǵyl jumystar atqarylyp jatyr

KÓKShETAÝ. QazAqparat – Aqmola oblysynda jylytý qazandyǵy jarylǵan mektepti dúısenbige deıin ortalyqtandyrylǵan jylýǵa qosý jumystary júrgizilip jatyr, dep habarlaıdy QazAqparat tilshisi.

Keshe Arshaly kentinde Jumabek Táshenov atyndaǵy orta mekteptiń jylytý qazandyǵy jarylyp, saldarynan 3 adam zardap shekken bolatyn.

Aımaq basshysynyń birinshi orynbasary Málǵajdar Tátkeevtiń tóraǵalyǵymen jedel shtab quryldy.

«Mektepti ortalyqtandyrylǵan jylytý júıesine qosamyz. Ol úshin uzyndyǵy 400 metr bolatyn qubyr aldyq. Mamandar kelip jatyr. Dúısenbi kúni mektepke jylý beremiz jáne odan ári mektep shtattyq rejımde jumys isteıtin bolady», - dedi Málǵajdar Tátkeev.

Tótenshe jaǵdaıdy joıý jumystaryna barlyq qyzmetter jumyldyryldy.

«Jylý qazandyǵy jarylysynyń saldaryn joıý jáne mektepti jylýmen qamtamasyz etý boıynsha jedel sharalar qabyldanyp jatyr. Bes júk kóligi, qoqys shyǵarýǵa arnalǵan 2 tıegish, avtokran jáne assenızator mashınasy jumys isteýde jáne qoqystan tazartý, ony shyǵarý júrgizilýde. Demeýshiler esebinen 22 tereze jóndelip jatyr. Jumystarǵa «Arshaly sý - 2030» ShJQ MKK, Arshaly aýdandyq elektr taratý jelisi, sondaı-aq jergilikti sharýa qojalyqtarynan 50 adam jumyldyryldy», - dedi vedomstvodan.

Aqmola oblysy ákimi baspasóz qyzmetiniń málimetinshe, qazandyqtyń jarylyp, opyrylýynan zardap shekkender – mekteptiń 3 jumysshysy. Olar qazir aýrýhanada.

Oqıǵa kezinde mektepten barlyq oqýshy dereý evakýatsııalandy. Balalar men muǵalimder arasynda zardap shekkender joq.

Aqmola oblysy Bilim basqarmasynyń málimetinshe, mektepte barlyǵy 395 bala oqıdy. 2014 jyly munda qazandyqtyń eki jylytý agregaty aýystyrylǵan. Al byltyrǵy jyldyń qarasha aıynda qazandyqtyń murjasy aýystyryldy.