Aqmola oblysynda Qazaqstannyń damýyna úles qosqan nurotandyqtar marapattaldy

KÓKShETAÝ. QazAqparat - «Nur Otan» partııasy Aqmola oblystyq fılıalynyń tóraǵasy, oblys ákimi Ermek Marjyqpaevtyń qatysýymen Táýelsizdiktiń 30 jyldyq mereıtoıy qarsańynda saltanatty jıyn ótti, dep habarlaıdy QazAqparat.

Sharada memlekettik jáne qoǵamdyq qyzmette sińirgen eńbegi úshin, eldiń áleýmettik-ekonomıkalyq damýyna úles qosyp, tabandylyǵymen tanylǵan nurotandyqtar memleket jáne partııa nagradalarymen marapattaldy.

Saltanatty is-sharada sóz sóılegen Ermek Marjyqpaev Táýelsizdik kúniniń máni men mańyzyna nazar aýdardy.

«Egemendiktiń 30 jylynda elimiz barlyq salada aýyz toltyryp aıtarlyqtaı jetistikterge qol jetkizdi, Elbasy saıasatynyń arqasynda Qazaqstannyń alpaýyt eldermen terezesi teń, álemdik qaýymdastyqta abyroı-bedelge ıe memleket bolyp qalyptasty», – dep atap ótti Ermek Marjyqpaev.

Bul kúni «Qazaqstan Respýblıkasynyń Táýelsizdigine 30 jyl» mereıtoılyq medalimen partııanyń Aqkól, Zerendi, Sandyqtaý, Shortandy aýmaqtyq fılıaldary tóraǵalarynyń birinshi orynbasarlary men oblystyq apparattyń saıası jumystar bóliminiń keńesshisi marapattaldy.

Koronavırýs pandemııasy kezinde turǵyndardy rýhanı demep, túrli jobalardy qolǵa alyp, belsendilik tanytqan úsh aqmolalyq belsendi «Halyq alǵysy» medaline ıe boldy.

Budan bólek, «Nur Otan» partııasy Aqmola oblystyq fılıalynyń tóraǵasy, oblys ákimi Ermek Marjyqpaevtyń ózi de joǵary partııalyq nagrada sanalatyn «Belsendi qyzmeti úshin» medalimen marapattaldy. Bul ıgi marapatqa oblystan 17 nurotandyq ıe boldy.

Sonymen birge, belsendi nurotandyqtar «Nur Otan» partııasy tóraǵasynyń birinshi orynbasary Baýyrjan Baıbektiń atynan «Qurmet gramotasymen» jáne oblys ákimi, partııanyń Aqmola oblystyq fılıalynyń tóraǵasy Ermek Marjyqpaevtyń «Alǵys hatymen» marapattaldy.