Aqmola oblysynda Qazaqstan halqynyń birligi kúni 1 myńnan astam shara ótti
KÓKShETAÝ. QazAqparat - «Qoǵamdyq kelisim» mekemesiniń qabyrǵasynda Qazaqstan halqynyń birligi kúni erekshe formatta ótti. Jyl saıynǵy buqaralyq merekelerdiń ornyna kóptegen is-sharalar onlaın-formatqa kóshti jáne ZOOM platformasynda nemese ózge de áleýmettik jelilerde ótkizildi, dep habarlaıdy QazAqparat tilshisi óńirdiń ishki saıasat basqarmasyna silteme jasap.
Vedomstvonyń málimetinshe, mereke qarsańynda Kókshetaý tehnıkalyq ınstıtýty men Sh.Ýálıhanov atyndaǵy Kókshetaý ýnıversıtetiniń stýdentteri úshin birlik pen toleranttylyqtyń qazaqstandyq úlgisin, qazaq memlekettiliginiń turaqtylyǵy men órkendeýiniń basty faktory retinde «Máńgilik el» ıdeıasyn qalyptastyrýdaǵy Qazaqstan halqy Assambleıasynyń róli týraly dárister ótkizildi.
«Dostyq úıi ulttyq taǵamdardy súıetinder úshin Facebook jáne Instagram áleýmettik jelilerinde «úıde birge ázirleıik» heshtegimen túrli etnostardyń ulttyq taǵamdaryn daıyndaý boıynsha onlaın sheberlik-synybyn uıymdastyrdy. Sondaı – aq, Býrabaı aýdanynyń 19 qolóner sheberi «Meniń Otanym-Meniń Qazaqstanym» kórmesin daıyndady. Óńir kitaphanalarynda «Birligimiz jarasqan» taqyryptyq saǵattar ótti. Memlekettik tildi erkin meńgergen óńirdiń shyǵarmashyl jastary «Abaı oqýlary» baıqaýynda Abaı shyǵarmalaryn jatqa oqyp berdi», - dedi vedomstvodan.
«Qoǵamdyq kelisim» mekemesi Qazaqstan halqy Aqmola assambleıasynyń akkaýnttarynda uıymdastyrǵan «Birligimiz jarasqan - Táýelsiz Qazaqstan» ınternet – aktsııasy túrli etnos ókilderiniń óleńderdi mánerlep oqýy memlekettik tildiń qajettiligin taǵy da kórsetedi.
Uıymdastyrýshylardyń aıtýynsha, oblys turǵyndary «Qazaqstan – birlik pen tatýlyq mekeni» dostyq festıvali, «Biz bir otbasymyz...» onlaın kontsertti tamashalaı aldy. Jalpy, bul kúni oblys boıynsha elimizdiń birligi men qoǵamdyq kelisimin qamtamasyz etýge baǵyttalǵan 1000 astam is-shara ótkizildi.
Aıta keteıik, mamyrdyń 1 Qazaqstan halqynyń birligi kúnin atap ótedi.
