Aqmola oblysynda qaza tapqan tártip saqshysy týraly fılm túsirildi
Aýmaqtyq Polıtsııa departamenti baspasóz qyzmetiniń málimetinshe, Qazaqstan Respýblıkasynyń Konstıtýtsııa kúni qarsańynda Tselınograd aýdandyq polıtsııa bóliminde qaza tapqan qyzmetker Jeńis Kúptenov týraly «Túngi oqıǵa izimen» derekti fılminiń tusaýkeseri ótti.
«Polıtsııa leıtenanty 2007 jyly qoǵamdyq tártip, azamattardyń tynyshtyǵy men beıbitshiligin qorǵaý jolynda qyzmettik boryshyn oryndaý kezinde qaza tapty. Jeke avtokóligimen úıine qaıtyp kele jatqan ol Aqmol aýylyndaǵy aıaldamada araq iship alǵan bir top jastardy sabyrǵa shaqyrmaqshy bolady. Alaıda, jastar onyń sózine qulaq aspaı, kerisinshe ózine jabyla ketedi. Artynsha, qoǵamdyq tártipti buzýshylar qashyp ketedi. Al, polıtsııa leıtenanty bolsa aýrýhana jetkizilgen. Dárigerler ajaldan arashalap qaala almady. Aýyr jaraqat saldarynan ol kóz jumdy. Onyń artynda júkti áıeli men kishkentaı qyzy qaldy», - dedi vedomstvonyń baspasóz hatshysy Ásem Ábdikárimova.
Fılm aýdandyq bólimniń jeke quramyna kórsetildi. Qoıylymda basty róldi Tselınograd polıtsııa bóliminiń qyzmetkeri aǵa serjant Aıan Nurmanov oınady. Sonymen birge, osy fılmniń basty keıipkeri Jeńistiń týystary men jaqyndary kórdi.
«Jeńis Janǵabyluly óte uqypty jáne jumysyna adal jan edi. Onyń krımınaldyq polıtsııa bólimshesinde jumys isteýdi armandaǵany áli esimde», - dep eske alady kadr saıasaty tobynyń ınspektory polıtsııa maıory Rıza Kúrjibaeva.
Tselınograd aýdandyq polıtsııa bóliminiń bastyǵy Qanat Bıtaqov qaza tapqan áriptesiniń anasyna, jubaıyna jáne qyzyna gúl shoqtaryn, al uly Nurjeńiske kartına tabys etti. Óz kezeginde marqumnyń anasy Baǵym men jubaıy Nurgúl otbasyna kórsetken qurmeti men qamqorlyǵy úshin polıtsııa qyzmetkerlerine alǵys aıtty.
Shara barysynda ishki ister organdarynda qyzmetin bastaǵan jas qyzmetkerler saltanatty túrde ant qabyldady.
