Aqmola oblysynda qaıyrymdylyq velojarysy ótedi
«Bul - januıalarǵa arnalǵan mýzyka jáne sport meıramy. Atalmysh sharany Aqmola oblysy ákimdiginiń qoldaýymen «Rixos Borovoe» qonaqúıi men Bolat Ótemuratovtyń Qory ótkizýde. Burabike qatysýshylary men qonaqtary 5 jyl ishinde qaıyrymdylyqqa 470 mıllıonnan astam qarjy aýdardy. Ótken jyly 168 mıllıon 429 myń 890 teńge jınaldy. Bul 2013 jylǵy (velojarys alǵash ótken kez) jınalǵan qarjymen salystyrǵanda 15 ese kóp», - deıdi Visit Aqmola týrıstik-aqparattyq ortalyǵynyń baspasóz qyzmetindegiler.
5 jyl ishinde qatysýshylar sany 8 ese ósken. Olardyń sany 130 adamnan 1 023 adamǵa jetken. Uıymdastyrýshylar bıyl 2000 adam qatysyp, olardyń 600-i 30 shaqyrymdyq qashyqtyqty eńseredi dep kútýde. Osylaısha balalardyń ómirin qutqaryp qalady degen úmit bar.
«Burabike-tan túsken qarajatqa Merke ortalyq aýdandyq aýrýhanasyna (Jambyl oblysy), Tımırıazev ortalyq aýdandyq aýrýhanasyna (SQO) , Alakól ortalyq aýdandyq aýrýhanasy men Panfılov aýdanyndaǵy perzenthanaǵa (Almaty oblysy), Aǵadyr aýylynyń aýrýhanasyna (Qaraǵandy oblysy) qajetti medıtsınalyq qurylǵylar satyp alynady», - dedi vedomstvo ókili.
Qashyqtyqtardy ótkergennen keıin barlyq qatysýshylar men qonaqtar taza aýada serýendep, qazaqstandyq jáne reseılik juldyzdardyń án-shashýyn, qaıyrymdylyq jármeńkesin, ártúrli sheberlik klastary jáne balalarǵa arnalǵan is-sharalardy tamashalaı alady.
«Velojarystyń barlyq qatysýshylary úshin Astanadan Şýchınskige deıin jáne artqa qaıtatyn transfer uıymdastyrylady. Astanadan júretin qatysýshylar elordalyq tsırktiń janynan tańǵy 6.00-den 6.45-ke deıin jınalady. Velosıpedter júk transferine tıeledi. Sondaı-aq, qatysýshylarǵa tańǵy jáne túski as beriledi. Velojarysqa qatysý úshin www.burabike.kz saıtynda tirkelýge bolady. Qatysam deýshilerge 5000 teńge kóleminde qaıyrymdylyq jarnasyn salý mindet. Bul qarajat balalarǵa kórsetiletin kómekke jumsalady», - dep málim etti Visit Aqmola týrıstik-aqparattyq ortalyqtyń baspasóz qyzmetindegiler.
