Aqmola oblysynda kásiporyn dırektory sheneýnikke para usynǵan
Aqmola oblysy boıynsha Sybaılas jemqorlyqqa qarsy is-qımyl departamentinde beınekonferentsııa arqyly Kókshetaý qalasynyń Sáýlet jáne qala qurylysy bóliminiń ókilderimen sybaılas jemqorlyq quqyq buzýshylyq jasaýǵa yqpal etken sebepter men jaǵdaılardy joıýdy talqylaý boıynsha kezdesý ótti.
Onlaın kezdesýge qatysýshylar QR Qylmystyq-protsestik kodeksi 200-babynyń negizinde buryn qozǵalǵan qylmystyq is boıynsha usynymdy qarady.
Atap aıtqanda, sotqa deıingi tergeý barysynda uıymnyń biriniń dırektory eskızdik jobany keliskeni úshin qalalyq Sáýlet jáne qala qurylysy bóliminiń laýazymdy tulǵasyna aqshalaı syıaqy usynǵany anyqtaldy, alaıda memlekettik qyzmetshi bas tartty. Degenmen, Bólim qyzmetkeri zańnamany buza otyryp, osy fakti týraly basshysyna tıisti túrde habarlamaǵan.
«Memlekettik organ basshylyǵy tarapynan baǵynysty qyzmetkerlerge tıisti baqylaýdyń bolmaýy jáne qyzmetkerlerdiń laýazymdyq mindetterin oryndaýǵa nemquraıly qaraý quqyq buzýshylyq jasaýǵa yqpal etti. Aldaǵy ýaqytta mundaı faktilerge jol bermeý maqsatynda sybaılas jemqorlyqqa qarsy is-sharalardy josparlaý jáne ótkizý kezinde formalızmdi joıý, mekeme qyzmetkerleri arasynda sybaılas jemqorlyq kórinisterine jol bermeý týraly túsindirý jumysyn, sybaılas jemqorlyqqa qarsy monıtorıng pen sybaılas jemqorlyq táýekelderine ishki taldaýdy sapaly júrgizý, sondaı-aq qyzmet kórsetý kezinde azamattar men memlekettik qyzmetshilerdiń tikeleı baılanysyn joıýdy kózdeý usynyldy», delingen habarlamada.
Budan basqa, engizilgen usynys sheńberinde atalǵan quqyq buzýshylyq úshin osy laýazymdy tulǵa tártiptik jaýapkershilikke tartyldy.
Nysandardyń qurylysy men qaıta jańartylýynyń tıisti sapasyn qamtamasyz etý qurylys salýshy tarapynan da, memlekettik mekemeler tarapynan da óz jumysyn adal oryndaýdy kózdeıdi. Alaıda, qurylystyń árbir kezeńinde qylmystyq shemalar men sóz baılasý arqyly sybaılas jemqorlyq áreketin jasaý úshin táýekelder týyndaıdy. Osy oraıda, qurylys salý týraly sheshim qabyldanǵan sátten bastap daıyn obektini eskplýatatsııaǵa tapsyrǵanǵa deıingi barynsha ashyqtyqty qamtamasyz etý qajet», - dep atap ótti óńirdiń Sybaılas jemqorlyqqa qarsy vedomstvosynyń basshylyǵy.