Aqmola oblysynda qarııalardyń úıine dári-dármek jetkizilip jatyr

KÓKShETAÝ. QazAqparat – Koronavırýs pandemııasyna baılanysty Aqmola oblysynda qarııalar men dárigerlerge volonterler kómekke kelip, dári-dármekti úıine jetkizip berýde, dep habarlaıdy QazAqparat tilshisi oblystyq ishki saıasat basqarmasyna silteme jasap.

Vedomstvonyń málimetinshe, 65 jastan asqan adamdardyń koronavırýs ınfektsııasyn juqtyrý qaýipi joǵary bolǵandyqtan olardyń úıden shyqpaýyna barynsha jaǵdaı jasalýda.

Kókshetaýda bul aktsııaǵa qalalyq emhana janyndaǵy úsh salaýatty ómir saltyn qalyptastyrý ortalyqtary qosyldy. Volonterlerdiń qoldaýymen oblys ortalyǵynda dıspanserlik esepte turǵan jáne tegin ambýlatorııalyq dárilerdi alatyn egde jastaǵy adamdarǵa dári-dármek úılerine jetkizilip berilýde.

«Osyndaı qıyn ýaqytta kómekke keletin belsendi jastardyń bolǵanyna qýanamyz. Bizde tirkelgen 95 myń adamnyń ishinde 13 myńnan astamy tegin dári-dármek alady. Birinshi kezekte áleýmettik jaǵynan az qamtylǵan adamdardyń arasynan jasy ulǵaıǵan adamdarǵa kómektesemiz. Naýryz meıramy kezinde atalmysh aktsııany bastap ketken edik. Qazirgi kezde ol qoldaý taýyp, odan ári jalǵasýda», - deıdi Kókshetaý qalalyq emhanasynyń bas dárigeri Rysty Syzdyq.

Jumysqa kirispes buryn volonterler arnaıy nusqamalyqtan ótedi. Sosyn ǵana qarııalardyń mekenjaıy boıynsha úıine baryp, dári-dármek úlestiredi.

«Bizdiń basty maqsatymyz – ata jáne ájelerimiz qaýpti ınfektsııany juqtyryp almaýyn qamtamasyz etý. Bizde qıyn kezde ıgi iske úles qosqanymyz úshin qýanyshtymyz. Birlesip ıgi iske atsalysaıyq!», - dep jergilikti jastardy ortaq iske atsalysýǵa shaqyrdy Kókshetaý joǵary medıtsınalyq kolledjiniń janyndaǵy «Mıloserdıe» volonterler qozǵalysynyń belsendileri Arman Kurmanǵazıev pen Sanjar Ábdirahmanov.