Aqmola oblysynda qarǵa batqan kıik qutqaryldy
NUR-SULTAN. QazAqparat – Elorda mańyndaǵy Qajymuqan aýylynyń turǵyny qarǵa batqan kıikti qutqaryp, tabıǵı mekenine jiberdi, dep habarlaıdy QazAqparat tilshisi.
«Kúni keshe bizdiń ınspektorlar qutqarylǵan aqbókendi bostandyqqa jiberdi. 14 aqpanynda Qajymuqan aýylynyń turǵyny Mádı Bektasovtan «102» qyzmetine qońyraý kelip túsken. Mádı myrza Nur-Sultan - Astrahan tas joly boıynda jabaıy aqbókenniń (kıik) qalyń qarǵa batyp qalǵanyn habarlaǵan», - dep jazyldy Orman sharýashylyǵy jáne janýarlar dúnıesi komıtetiniń Facebook paraqshasynda.
Sol kúni Aqmola oblystyq orman sharýashylyǵy jáne janýarlar dúnıesi aýmaqtyq ınspektsııa ınspektorlary, Tselınograd aýdany polıtsııa bóliminiń tabıǵatty qorǵaý ınspektory, RMQK ÓB «Ohotzooprom» ınspektorlary birlesip aqbókendi qutqarý operatsııasyn bastap ketken.
«Mádı myrza qarǵa batqan kıikti úıine alyp kelgen eken. Inspektorlar aqbókendi Tselınograd aýdany Maksımovka aýyldyq okrýginde ornalasqan «Tselınograd» ańshylyq sharýashylyǵy aýmaǵyna, olardyń tabıǵı mekeninen jibergen. Mamandardyń paıymyna súıensek, aqbókenniń jaǵdaıy jaqsy, jaraqat baıqalmaǵan», - deıdi komıtet.
Buǵan deıin Ekologııa mınıstrligi kıikterge qamqorlyq tanytýǵa shaqyrǵan edi.
«Sebebi sońǵy ýaqytta Qaraǵandy jáne Aqmola oblystarynyń eldi mekenderi men avtomobıl joldarynyń mańynda aqbóken jıi baıqala bastady. Olardyń ishinde álsirep qalǵan múıizdi kıik (erkek) kóp. Bul 2020 jyldyń jeltoqsan aıynda ótken kúıek kezeńiniń saldary. Budan bólek qalyń jaýǵan qar men kúnniń kúrt sýytyp, aýa temperatýrasynyń sońǵy 5-6 kúnde - 40 gradýsqa deıin tómendeýi de aqbókenniń jaǵdaıyna áserin tıgizip jatyr. Atalǵan faktorlar kıikterdiń tirshiligin, azyqtandyrylýyn qıyndatyp, ómirine qaýip tóndirip jatyr. Jyl basynan beri 14 kıik ólimi tirkeldi», delingen habarlamada.
Qazaqstanda kıikterdiń Oral, Betpaqdala jáne Ústirt popýlıatsııasy mekendeıdi. 2019 jylǵy esep boıynsha kıik sany 334 myńǵa jetti. 2020 jyldyń kókteminde engizilgen shekteýge baılanysty esep júrgizilgen joq. Alaıda 2020 jylǵy kıik tóliniń kóp bolǵanyn eskere otyryp, qazir olardyń sany 450 myńnan asty dep boljanady.
