Aqmola oblysynda karantındik shekteýlerdi jeńildetý týraly jańa qaýly shyqty

KÓKShETAÝ. QazAqparat- Aqmola oblysy Bas memlekettik sanıtarlyq dárigeriniń karantındik shekteýlerdi jeńildetý týraly jańa qaýlysy shyqty dep habarlaıdy QazAqparat tilshisi.

Qaýlyda óńirdiń «jasyl» aımaqqa ótýine baılanysty «Ashyq» jobasyna qatysatyn barlyq áleýmettik-ekonomıkalyq obektilerdiń qyzmetine ruqsat etilgen.

«Sonymen birge «Ashyq» jobasyna qatyspaıtyn áleýmettik-ekonomıkalyq obektilerdiń qyzmetine de ruqsat etilgen. Alaıda, medıtsınalyq ortalyqtar, kabınetter, stomatologııalar aldyn ala jazylý boıynsha jumys isteıdi. Qoǵamdyq kólikterge qatysty qarbalas saǵattarda avtobýstar sanyn kóbeıtý, barlyq esikterdi ashý, otyratyn oryndar sany boıynsha toltyrý talaby qoıylady. Uıymdar, keńseler qyzmetkerlerge COVID-19-ǵa qarsy vaktsınatsııalaý júrgizilgen jaǵdaıda qyzmetin qashyqtyqtan jáne kúndizgi jumys formatynda jumys isteıtin qyzmetkerlerdiń paıyzdyq araqatynasy boıynsha talaptardy eskermeı júzege asyrady. Bul rette COVID-19-ǵa qarsy vaktsınatsııalaýdyń tolyq kýrsyn alǵan jáne sońǵy 3 aı ishinde COVID-19-ben aýyryp jazylǵan barlyq qyzmetkerlerdiń kúndizgi rejımde (jumys ornynda) jumys isteýine jol beriledi», - delingen qujatta.

Qaýly qol qaıylǵan kúnnen, 2022 jylǵy aqpannyń 22-nen bastap kúshine enedi.

Aıta ketsek, epıdahýaldy baǵalaý matrıtsasy boıynsha búginnen bastap, Aqmola oblysy da «jasyl» aımaqqa shyqqan edi.