Aqmola oblysynda karantın talaptaryn buzyp, toı ótkizgender anyqtaldy
Oblystyq sanıtarlyq-epıdemıologııalyq baqylaý departamenti baspasóz qyzmetiniń málimetinshe, Aqmola oblysynda 27 qyrkúıekten bastap Ashyq-ta «Qaýipsiz» mártebesi bar kelýshilerdiń qatysýymen saltanatty, estelik, otbasylyq is-sharalar, banketter, úılený toılary, mereıtoılar ótkizýge ruqsat etildi (50 paıyzǵa deıin, 50 orynnan artyq emes). Tıisti sheshimdi COVID-19 taralýyn boldyrmaý jónindegi vedomstvoaralyq komıssııa qabyldady. Alaıda, mundaǵy talaptardy kásipkerler men aımaq turǵyndarynyń barlyǵy birdeı saqtaı bermeıdi.
«Ótken demalys kúnderi Tselınograd aýdanynyń monıtorıngtik toby 3 buqaralyq is-sharanynyń ótkizilgenin anyqtady. Máselen, Qosshy qalasynyń «Arýjan plaza» meıramhanasynda úılený toıy ótti. Іs-sharaǵa 160 adam shaqyryldy. «Baıandy» meıramhanasynda 150 adamǵa arnalǵan taǵy bir úılený toıy toqtatyldy. Banketter ótkizý kezinde Ashyq qatysýshylarynyń jumys tártibi buzylǵan. Al Qoıandy aýylynda Ashyq qatysýshysy bolyp tabylmaıtyn «Alash» meıramhanasynda 100 qonaqtyń qatysýymen toı ótkizildi», - dedi vedomstvodan.
Sonymen qatar, Atbasar aýdanynda «Darına» meıramhanasynda 70 adamnyń qatysýymen týǵan kún atalyp ótti. Sol kúni «Ashat» dámhanasynyń banket zaly da qyz uzatý ótkizetin qonaqtarǵa toly boldy, oǵan 70-ten astam adam qatysty. Bul nysandar Ashyq qatysýshylary bolyp tabylady.
«Karantındi buzýshylardyń tizimin Kókshetaý qalasynyń, Býrabaı jáne Astrahan aýdandarynyń nysandary toltyrdy, onda maska rejımi saqtalmaǵan, mekeme qyzmetkerleri jumys rejımin buzǵan», - dep tolyqtyrdy vedomstvodan.
Jalpy, bir apta ishinde 327 nysan monıtorıngpen qamtyldy, onyń ishinde karantındik sharalardy buzýdyń 16 faktisi nemese 4,9 paıyz anyqtaldy.
