Aqmola oblysynda karantın talaptaryn buzǵandarǵa 26,7 mıllıon teńge aıyppul salyndy

KÓKShETAÝ. QazAqparat - Aqmola oblysynda karantın talaptarynyń saqtalýy monıtorıng toptarynyń turaqty baqylaýynda. Bul týraly oblystyq sanıtarlyq-epıdemıologııalyq baqylaý departamentiniń basshysy Aınagúl Mýsına aıtty, dep habarlaıdy QazAqparat tilshisi.

Deparatament basshysynyń aıtýynsha, jyl basynan beri monıtorıngtik top karantın rejımin saqtaý boıynsha túrli menshik nysandaryndaǵy 6951 nysandy tekserdi. Nátıjesinde 199 nysanda karantındik talaptardyń buzylǵandyǵy anyqtaldy.

Atap aıtqanda, qoǵamdyq tamaqtaný obektilerinde tyıym salynǵanyna qaramastan, maska rejıminiń saqtamalǵany, shekteýli ýaqyttan keıin keıbir karaoke, dámhana-barlardyń jumys istegeni anyqtaldy.

Úıde uıymdastyrylǵan kópshilik sharalar da tıylar emes. Jyl basynan beri qyz uzatý, úılený toıy, tusaýkeser sııaqty kópshilik sharalardy ótkizýdiń 9 jaǵdaıy tirkeldi.

«Anyqtalǵan zań buzýshylyqtar boıynsha jalpy sommasy 26 mıllıon 788 myń 475 teńge bolatyn, 239 ákimshilik aıyppul salyndy», - dedi Aınagúl Mýsına.

Vedomstvo basshysy atap ótkendeı, demalys kúnderi (20-21 aqpan aralyǵynda) monıtorıngtik toptar 68 reıdtik tekserý júrgizdi, monıtorıngpen 314 nysan qamtyldy, 7 obektide zań buzýshylyqtar anyqtaldy. Onyń ishinde Atbasar aýdanynda («K.M.Kúlıev» JK-niń «Býrabaı» dámhanasy), Býrabaı aýdanynda («Kókshebel» qonaq úıi, Býrabaı kenti), Tselınograd aýdanynda («Pıffkov» bary, Qosshy aýylyndaǵy «Janel» jáne «Sharm» sulýlyq salondary, Talapker aýylyndaǵy «Ádemi» shashtarazy) jáne Kókshetaý qalasynda («Rýkı ız plech» JShS «JJT» bary) bar.

Al 2021 jyldyń basynan beri karantın rejımin birneshe ret buzǵan eki mekeme anyqtaldy. Bular Kókshetaý qalasyndaǵy «Rýkı ız plechı» JShS-niń «JJT» bary jáne Atbasar aýdany «K.M.Kúlıev» JK-niń «Býrabaı» dámhanasy.

«Rýkı ız plechı» JShS-niń «JJT» barynyń qyzmetin toqtatý týraly materıaldar ákimshilik sotqa jiberilse, «K.M.Kúlıev» JK-niń «Býrabaı» dámhanasy boıynsha materıaldar qaralyp jatyr», - dep tolyqtyrdy Aınagúl Mýsına.