Aqmola oblysynda karantın shekteýi kúsheıtildi

KÓKShETAÝ. QazAqparat - Aqmola oblysynda karantınniń shekteý sharalaryn kúsheıtý týraly óńirdiń bas sanıtarlyq dárigeriniń kezekti qaýlysy shyqty, dep habarlaıdy QazAqparat tilshisi.

Jańa qaýlyda otbasylyq, estelik (banket, úılený toı, mereıtoı, duǵa) jáne kópshilik jınalatyn ózge de is-sharalardy qoǵamdyq tamaqtaný obektilerinde jáne úıde ótkizýge tyıym salynyp otyr. Sonymen birge, qoǵamdyq tamaqtaný obektilerinde jáne úıde (otbasylyq, estelik is-sharalary (banket, úılený toı, mereıtoı, merekelik korporatıv, lotereıa utys oıyny) uıymdastyrylǵan kópshilik jınalatyn is-sharalarǵa, sondaı-aq qyzmeti QR jáne Aqmola oblysynyń BMSD-niń qoldanystaǵy qaýlylarymen shektelgen obektilerge barýdan bas tartý usynyldy.

«Kópshilik is-sharalaryn (merekelik, kópshilik sport, oıyn-saýyq mádenı-kópshilik is-sharalardy, forým, konferentsııa t.b. ótkizýge), otbasylyq is-sharalardy (banket, úılený toıy, mereıtoı, merekelik korporatıv, duǵa) jáne kópshilik jınalatyn ózge de is-sharalardy, onyń ishinde úıde ótkizýge tyıym salynady. Oıyn-saýyq mekemeleri (karaoke, bılıard, kompıýter klýbtary, túngi, oıyn klýbtar, boýlıng ortalyqtary, jabyq úı-jaılardaǵy balalardyń oıyn alańdary men attraktsıondary, batýt jáne taǵy basqalar), býkmeker keńseleriniń jáne eresekter men balalarǵa arnalǵan ózge de oıyn-saýyq, kalıan oryndarynyń (onyń ishinde qoǵamdyq tamaqtaný obektilerindegi) qyzmeti toqtatylady. Merekelik korporatıvterdi uıymdastyrý men ótkizýge, kórermenderdiń qatysýymen sport is-sharalaryn ótkizýge tyıym salynady»,- delingen qaýylda.

Budan bólek, banket zaldary, balalarǵa arnalǵan oıyn-saýyq ortalyqtary, mádenıet obektiler, kınoteatr, teatr, kontsert zaldary, júıeli júrmeıtin oblysaralyq jáne qalalyq (týrıstik tasymal) qozǵalysyn toqtatady.

Al senbi men jeksenbide jabyq azyq-túlik emes bazarlardyń, saýda oıyn-saýyq ortalyqtary, saýda úıleri, saýda ortalyqtarynyń, balalar oıyn alańdary men attraktsıondarynyń, fıtnes ortalyqtary, trenajer zaldary men sport-saýyqtyrý ortalyqtarynyń, saýna, basseın, SPA ortalyqtarynyń qyzmetine tyıym salynady.

Sonymen qatar, shtattyq kestede 20-dan artyq qyzmetker bolǵanda, qyzmetkerlerdiń keminde 80 paıyzy qashyqtyqtan jumys atqarady.

Jańa qaýly 2021 jylǵy 11 sáýirde saǵat 00.00-den bastap kúshine enedi.