Aqmola oblysynda qandaı eldi mekenderge gaz tyrtylady
KÓKShETAÝ. QazAqparat - Aqmola oblysynyń Arshaly jáne Tselınograd aýdandaryndaǵy eldi mekenderge gaz tartý jospary jasaldy, dep habarlaıdy QazAqparat tilshisi oblystyq ishki saıasat basqarmasyna silteme jasap.
Jospar boıynsha birinshi kezekte «Arshaly» AGTS jáne AGTS-1 stansalarynan bastap «Qyzylorda-Qaraǵandy-Astana» magıstraldy gaz qubyrynyń qurylysyn júrgizý kózdelgen. Osylaısha, 2019 jyly «Astana» AGTS-2 arqyly Arshaly jáne Tselınograd aýdandaryna gaz tartýdy bastaýǵa bolady.
«Saryarqa» magıstraldy gaz qubyryna deıin gaz tartý jeliniń qurylysyn júrgizý úshin óńirde Jol kartasy jasaldy. Mamyr aıynda Aqmola oblysynyń bıýdjetinen 100 mıllıon teńge qarjy bólinip, gaz tartý jelisiniń jospary jasaldy jáne «Qyzylorda-Qaraǵandy-Astana» magıstraldy gaz qubyryna jaqyn eldi mekenderde jobalyq-smetalyq qujattary ázirlendi.
Osy rette Arshaly aýdanyndaǵy Anar, Donetskıı, Túrgen, Birsýat, Baıdala, Arshaly, Aqbulaq, Aqtasta, Ijevskıı, Shóptikól, Babataı, Arnasaı, Volgodonovka, 42 razezd, Qoıgeldi, Jaltyrkól, Jibek joly sııaqty 17 aýylǵa gaz tartý úshin 56,1 mıllıon teńge qarjy bólinse, Tselınograd aýdanyndaǵy Talapker, Qoıandy jáne Shubary aýyldary úshin bólingen 43,9 mıllıon teńge qarjy ıgerilýi tıis.
Oǵan qosa, Tselınograd jáne Arshaly aýdandaryndaǵy barlyǵy 151 myń halqy bar 44 eldi mekenge gaz jetkizý josparda bar. Gaz tartý boıynsha qurylys jumystarynyń ekinshi kezeńi 2022 jyly «Astana-Kókshetaý» ýchaskesinde júzege asyrý qarastyrylǵan.
