Aqmola oblysynda qandaı áleýmettik nysandar salynady
KÓKShETAÝ. QazAqparat - Aqmola oblysynyń qurylys basqarmasynyń bólim basshysy Nııaz Baıǵojın QazAqparat tilshisine Aqmola oblysynda qandaı áleýmettik nysandar paıdalanýǵa berilgenin jáne jaqyn arada qandaı nysandar salynatyn aıtty.
Onyń aıtýynsha, Aqmola oblysynda áleýmettik sala nysandary boıynsha 2021 jyly 51 joba júzege asyryldy. Olardyń 18-i ótken jyly iske qosyldy.
«Paıdalanýǵa berilgen asa iri nysandardyń ishinde Tselınograd aýdanynyń Razdolnoe aýylynda 80 oryndyq mektep, Tselınograd aýdanynyń Qaraótkel aýylynda bir aýysymda 25 adam qabyldaıtyn dárigerlik ambýlatorııa, Kókshetaý qalasyndaǵy №1 orta mektepke 600 oryndyq japsarjaı (syrtqy ınjenerlik jelilersiz jáne abattandyrýsyz), Aqmol aýylynda dene shynyqtyrý-saýyqtyrý kesheniniń qurylysy bar. Sondaı - aq, 2021 jyly Tselınograd aýdany Tóńkeris aýylynda 110 oryndyq modýldik mektep ashyldy», - dedi N.Baıǵojın.
Bólim basshysy atap ótkendeı, 2022 jylǵa áleýmettik sala qurylysynyń 33 nysanyn iske asyrýǵa 9 mlrd 632 mln 712 myń teńge somasynda bıýdjet qarajaty bólingen.
«Bilim berý salasynda eń iri jobalardy iske asyrý jumystary jalǵasady. 2022 jyly Tselınograd aýdanynyń Qosshy aýylynda árqaısysy 1200 oryndyq eki mektep, 2023 jyly Qosshy qalasynda 1200 oryndyq úshinshi mektep, sondaı – aq Kókshetaý qalasynda 1200 oryndyq mektep paıdalanýǵa beriledi», - dep tolyqtyrdy N.Baıǵojın.
2020 jyldan bastap Kókshetaý qalasynda 150 oryndyq múgedekterdi ońaltý ortalyǵynyń, Birjan sal aýdanynyń Stepnıak qalasynda emhanasy bar 50 tósektik aýrýhananyń, Tselınograd aýdanynyń Qaraótkel aýylynda bir aýysymda 25 adam qabyldaıtyn dárigerlik ambýlatorııanyń qurylysy sııaqty mańyzdy áleýmettik jobalar boıynsha jumys júrgizilýde.
«Basty mindet – oblystyń árbir aýdanynda qoljetimdi ınfraqurylymdy qamtamasyz etý. Densaýlyq saqtaý jáne bilim berý nysandarynyń bolýy eldi mekenderde mańyzdy bolyp tabylady», - dep túıindedi N.Baıǵojın.
