Aqmola oblysynda qaǵaz shyǵaratyn zaýyt salynýy múmkin
KÓKShETAÝ. QazAqparat- Aqmola oblysynda qaǵaz shyǵaratyn zaýyt salý josparlanýda. Bul týraly Aqmola oblysynyń ákimi Málik Myrzalınniń Qytaı Halyq Respýblıkasynyń Gonkong qalasyna jumys saparynyń aıasynda ınvestıtsııalyq baǵyttaǵy kompanııalar tobynyń jetekshisi, Qytaıdyń syrtqy saýda keńesiniń vıtse-prezıdenti Devıd Choýmen ótken kezdesýinde aıtyldy, dep habarlaıdy QazAqparat tilshisi əkimdiktiń baspasóz qyzmetine silteme jasap.
Kezdesý barysynda taraptar bıdaıdyń sabanyn keshendi óńdeýmen aınalysatyn joǵary tehnologııaly zaýyt qurylysyn salýdyń naqty múmkindikterin talqylady.
«Bul zaýyt iske qosylǵan jaǵdaıda jylyna 15 myń tonna bıomassa, 34 myń tonna tsellıýloza, 45 myń tonna bıootyn, 11 mıllıon tekshe metr bıogaz, 2 mıllıon tonna organıkalyq suıyq tyńaıtqysh óndiretin bolady. Bul ónim oblysymyzdyń aýyl sharýashylyǵy qurylymdarynyń suranysyn tolyq qanaǵattandyrady. Salynatyn ınvestıtsııa kólemi 300 mıllıon dollar bolady dep kútilýde. Kásiporyn qorshaǵan ortaǵa zalal keltirmeıdi. Jobany júzege asyrý arqyly 600 otandasymyz jańa jumyspen qamtylar edi», - dep atap ótti oblys ákimi Málik Myrzalın.
Sonymen qatar, sapar barysynda Aqmola oblysynyń delegatsııasy Gonkong saýda qaýymdastyǵy mıssııasymen jáne Qytaıdyń ońtústik provıntsııasynyń bıznes ókilderimen kezdesti.
Óz kezeginde qytaılyq kásipkerler qazaqstandyq ónimderge, onyń ishinde «Kókshetaý mıneraldy sýlary» AQ óndirgen TURAN sýyna qyzyǵýshylyq tanytty. Gonkong pen eldiń ońtústik provıntsııasy - Gýandýnda 100 mıllıondaı halyq turady.
Taraptar marketıngtik taldaý júrgizip, qazaqstandyq ónimdi satýdyń birlesken strategııasyn jasaýǵa ýaǵdalasty.
