Aqmola oblysynda Jańa Dala halyqaralyq kórmesi ótip jatyr
Halyqaralyq kórme elordadan 90 shaqyrym jerde Aqmola oblysy Aqkól aýdanyndaǵy «Eńbek» JShS alańynda ótip jatyr.
«Mamandandyrylǵan kórme jyl sanap keńeıip keledi. Kórmege qatysyp jatqan biraz kompanııalarmen birge jumys istep júrmiz. Mysaly, Frantsııamen qarym-qatynas jyl sanap artyp keledi. Jyl ishinde eki el arasynda taýar aınalymy 40 ese ósip, 60 mln AQSh dollaryn qurady. Avstrııamen de osyndaı jaǵdaı. Aýyl sharýashylyǵyn sóz etkende Aqmola oblysyn aıtpaı ketýge bolmaıdy. Bizdiń óńir astyq aımaǵy deýge bolady. Elimizdegi aýyl sharýashylyǵy ónimderiniń 15% Aqmola oblysynan shyǵady. Bıdaıdyń ár 4 kelisi bizdiń óńirde ósiriledi. Ótken jyldyń qorytyndysy boıynsha aýyl sharýashylyǵy ónimderiniń kólemi 1 trln teńgege jetti», - dedi Aqmola oblysynyń ákimi Ermek Marjyqpaev halyqaralyq kórmeniń ashylý saltanatynda.
Uıymdastyrýshylardyń málimetinshe, bıylǵy sharaǵa 19 elden 150 agrarlyq kásibı kompanııa qatysyp jatyr.
Atap aıtqanda, Avstrııa, Belarýs, Germanııa, Ispanııa, Italııa, Kanada, Qytaı, Qyrǵyzstan, Nıderland, Polsha, Reseı, Serbııa, AQSh, Túrkııa, Fınlıandııa, Frantsııa, Ózbekstan, Ýkraına, Chehııa jáne taǵy basqalar.
Kórme qatysýshylary aýyl sharýashylyǵy tehnologııalary, selektsııalyq jetistikter men mal sharýashylyǵy salasyndaǵy sońǵy ónimderdi usynyp jatyr.
Eki kúnge sozylatyn is-sharany 10 myńnan astam adam tamashalaıdy dep kútilýde.
Sondaı-aq, uıymdastyrýshylar bergen aqparatqa sáıkes, topyraq óńdeý boıynsha demo-kórsetilim usynylyp, aýyl sharýashylyǵy daqyldarynyń selektsııalyq ýchaskeleri, sol sııaqty ósimdik jáne mal sharýashylyǵy tehnıka men jabdyqtar synaqtan ótedi.
Odan bólek, iskerlik baǵdarlama aıasynda sheberlik saǵaty, fermerlerge arnalǵan semınarlar, sonymen qatar qazaqstandyq jáne sheteldik sarapshylardyń qatysýymen «Innovatsııalardy engizý jáne sút-taýar fermalarynyń quzyretin arttyrý» halyqaralyq konferentsııasy ótedi.
