Aqmola oblysynda izdeýde júrgen 3 reseılik ustaldy
KÓKShETAÝ. QazAqparat – Reseı Federatsııasy aýmaǵynda izdeýde júrgen úsh qylmysker Aqmola oblysynda ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, «Іzdeý» memleketaralyq arnaıy operatsııasy, «Kelimsek» jáne «Zańdylyq» jedel – aldyn alý sharasy kezinde Reseı Federatsııasy aýmaǵynda izdeýde júrgen bes qylmysker Aqmola oblys aýmaǵynda anyqtaldy. Onyń úsheýine Omby oblysy boıynsha Reseıdiń ІІM basqarmasy izdeý jarııalanǵan.
«Esirtki zatyn ótkizip, saýdalaǵan úshin RF QK 228-babynyń 4-bóligi boıynsha sottalǵan eki qylmysker Kókshetaýda ustaldy. Budan bólek, RF QK 159-babynyń 2-bóligi boıynsha alaıaqtyq jasaǵany úshin izdeýde júrgen QR 35 jastaǵy turǵynynyń mekenjaıy anyqtaldy.
Taǵy eki qylmysker Nur-Sultan qalasy men Arshaly aýdany aýmaǵynda ustaldy. Onyń biri - QR QK 345-babynyń 3-bóligi boıynsha kólik quralyn basqarý kezinde jol qozǵalysy erejesin buzǵany úshin, ekinshisi, QR QK 296-babynyń 2-bóligi boıynsha qylmys jasaǵany úshin izdeýde júrgen», - dep aıtty vedomstvodan.
Sonymen qatar, shara sheńberinde polıtsııa qyzmetkerleri bazar, qoǵamdyq tamaqtaný, oqý oryndary, jeke qurylys alańdary sııaqty sheteldik jumys kúshi qoldanylatyn oryndardy tekserýde.
