Aqmola oblysynda iz-túzsiz joǵalǵan oqýshy qyzdar izdestirilip jatyr

KÓKShETAÝ. QazAqparat - Aqmola oblysy polıtsııasy iz-túzsiz joǵalǵan eki jasóspirim qyzdy izdestirip jatyr, dep habarlaıdy QazAqparat tilshisi oblystyq polıtsııa departamentiniń baspasóz qzymetine silteme jasap.

Vedomstvonyń málimetinshe, 7 maýsymda Aqkól aýdandyq PB kezekshi bólimine jergilikti turǵyn habarlasyp, 2008 jyly týǵan qyzy Anastasııa Alekseevna Matsty izdep tabýǵa kómek suraǵan.

«Ákesiniń sózinshe, qyzy 7 maýsym saǵat 11:00 shamasynda úıinen shyǵyp ketip, sodan qaıtyp oralmaǵan. Joǵalǵan qyz ústine qara tústi keýdeshe (topık), kógildir tústi trıko, aq tústi krossovka kıgen. Ózimen birge qara tústi rıýkzak boldy», - dedi vedomstvodan.

Sonymen birge, polıtsııaǵa maýsymnyń 8-de jergilikti balalardy qoldaý ortalyqtarynyń biriniń aǵa tárbıeshisinen 7 maýsymda qashyp ketken 14 jasar tárbıelenýshi Eleonora Rafaılovna Aıashevany izdestirýge járdemdesý týraly ótinish túsken.

«Polıtsııa qyzmetkerleri anyqtaǵandaı, qurbylar «Mersedes» avtokóligimen (jeke taksı) Astana qalasyna baryp, saǵat 16:00-de «12 mesıatsev» qurylys dúkeniniń aýmaǵynda kólikten túsken», - dep tolyqtyrdy vedomstvodan.

Aıta ketsek, budan buryn Aqmola oblysynda 17 jastaǵy jasóspirim qyzdyń sýǵa batyp ketkenin jazǵan edik.