Aqmola oblysynda iz-túzsiz joǵalǵan naýqas Astanada meıramhanadan tabyldy
KÓKShETAÝ. QazAqparat - Aqmola oblysynda iz-túzsiz joǵalyp ketken 24 jastaǵy naýqas qyz aman-esen tabyldy, dep habarlaıdy QazAqparat tilshisi.
ІІD baspasóz qyzmetiniń málimeti boıynsha aǵymdaǵy jyldyń 13 qarashasynda Kókshetaý qalalyq ІІB kezekshilik bólimine jergilikti aýrýhanalardyń birinde emdelip jatqan 24 jastaǵy Aınur Qaraqyz esimdi naýqastyń joǵalyp ketkeni týraly aqparat túsken.
Atalmysh aýrýhananyń bas dárigeriniń túsiniktemesi boıynsha, joǵalǵan qyz sol kúni statsıonar bólimshesinen úıine shyǵýy kerek bolatyn. Alaıda, qyz shyǵýǵa bir kún qalǵanda, 12 qarasha kúni, dárigerdiń ruqsatynsyz óz erkimen ketip qalǵan.
Keıin tergeý amaldary barysynda Aınurdyń osyǵan deıin Bulandy aýdanynyń Kýpchanovka selosyndaǵy arnaıy áleýmettik qyzmet kórsetý ortalyǵynda em alǵany jáne psıhıatr dárigerdiń esebinde bolǵany anyqtaldy.
Ony izdeýge polıtseıler men eriktiler de tartylyp, avtokólik, temirjol vokzaldary men halyq kóp jınalatyn oryndardy súzip shyqty. Sonymen qatar, Kókshetaý qalalyq ІІB krımınaldy polıtsııa qyzmetkerleri Astanada da izdestirý sharalaryn júzege asyrdy. Nátıjesinde joǵalǵan qyz 28 qarasha kúni Astanadaǵy meıramhanalardyń birinde ydys jýýshy bolyp, jumys istep júrgen jerinen ustaldy.
Qazirgi kezde Aınur Qaraqyz Bulandy aýdanynyń Kýpchanovka selosyndaǵy arnaıy áleýmettik qyzmet kórsetý ortalyǵyna jatqyzyldy.
Jalpy, jyl basynan beri oblys boıynsha iz-túzsiz joǵalǵan 77 adam tabyldy.
