Aqmola oblysynda iz-túzsiz joǵalǵan 18 jastaǵy jigitke izdeý jarııalandy

KÓKShETAÝ. QazAqparat - Tselınograd aýdany Qoıandy aýylynyń18 jastaǵy turǵyny Ádilet Orazbekke izdeý jarııalandy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

Vedomstvonyń málimetinshe, Ádilet bıylǵy mamyrdyń 17-sinde saǵat 16:00 shamasynda úıinen shyǵyp ketip, qaıtyp oralmaǵan.

«Mamyrdyń 22-sine deıin anasy ózi izdep kórgen, odan nátıje bolmaǵan soń polıtsııaǵa habarlasty. Áıeldiń sózinshe, uly sol kúni saǵat 19:00-de uıaly telefonymen qońyraý shalyp, jaqyn arada úıine keletinin aıtqan. Alaıda, jigit sol kúıi kelmedi. Joǵalǵan jigittiń ornalasqan jerin anyqtaý maqsatynda polıtsııa qyzmetkerleri izdestirý sharalaryn qolǵa aldy. Tanystary men dostarynan surastyrdy», - dedi vedomstvodan.

Joǵalǵan adamdy izdeýge PD bólimsheleri, Tselınograd aýdandyq PB jeke quramy, sondaı-aq, Astana qalalyq PD qyzmetkerleri tartylǵan.

Osy rette, tártip saqshylary Ádilet Orazbektiń ornalasqan jeri týraly qandaı da bir aqparaty bar nemese biletin adamdar bolsa, dereý 102 arnaıy jelisine qońyraý shalýyn suraıdy.

Aıta ketsek, budan buryn Aqmola oblysynda on kún buryn joǵalǵan er adamnyń denesi tabylǵanyn jazǵan edik.