Aqmola oblysynda iz-túzsiz ketken ana men bala bir aptadan keıin tabyldy
KÓKShETAÝ. QazAqparat - Demalys kúnderi polıtseıler iz-túzsiz joǵalǵan úsh aqmolalyqty izdep tapty, dep habarlaıdy QazAqparat oblystyq polıtsııa departamentine silteme jasap.
Polıtsııa qyzmetkerleri ótken demalys kúnderi habar-osharsyz ketken Aqmola oblysynyń úsh turǵynynyń qaıda júrgenin anyqtady.
Onyń arasynda Býrabaı aýdanynyń 54 jastaǵy turǵyny bar, ony polıtseıler Jasyl jáne Shııaly aýyldary arasyndaǵy orman alqabynan tapqan.
Ótinish berýshiler er adam ishinara este saqtaý qabiletinen zardap shegetinin habarlady.
Іzdestirý sharalary kezinde jedel ýákilder joǵalǵan adam júrýi múmkin búkil eldi mekender men oryndardy anyqtap, nátıjesinde onyń ormanda ekenin anyqtady.
Keıinirek belgili bolǵandaı, joǵalǵan adam jıdek jep, tabıǵı sý qoımalarynan sý ishken.
Sondaı-aq, polıtseıler Kókshetaý qalasynyń 14 jastaǵy turǵynyn tapty.
Ol jaqyndaryn habardar etpeı, týystaryna barǵan. Qyz keshki saǵat 11-de jol boıynan tabyldy.
Atalǵan fakti boıynsha ata-anaǵa qatysty QR ÁQBtK 442-babynyń 2-bóligi boıynsha ákimshilik hattama toltyrylyp, profılaktıkalyq áńgime júrgizildi.
Sonymen qatar, Zerendi aýdanynyń 34 jastaǵy turǵyny men onyń 4 jasar qyzy tabyldy.
Ony izdeýge kómek kórsetý týraly aryzben 26 qyrkúıekte polıtsııaǵa onyń kúıeýi júgingen bolatyn.
Jyl basynan beri oblys turǵyndary habar-osharsyz ketkender týraly 70 ret polıtsııaǵa aryzdanǵan, onyń ishinde 63 adam tabylǵan.
