Aqmola oblysynda ınvestıtsııa kólemi 23 paıyzǵa ósti
«Óńirde osy jyldyń 10 aıynyń qorytyndysyna sáıkes qyzmettiń kóptegen baǵyty boıynsha jaqsy nátıjege qol jetkizildi. Ósim, eń aldymen, naqty sektor salalarynyń esebinen qamtamasyz etildi: ónerkásipte – 106,3%, aýyl sharýashylyǵynda - 114,2%, qurylysta-111,7%. Aqmola oblysynyń negizgi kapıtalyna salynǵan ınvestıtsııalar kólemi ótken jylmen salystyrǵanda 23 paıyzǵa ósti, jyl basynan beri ekonomıkaǵa 340 mlrd teńgege jýyq qarjy baǵyttaldy. Bul kórsetkish boıynsha bizdiń oblys elimizdegi úzdik úshtiktiń qatarynda», - dedi ákim Ortalyq kommýnıkatsııalar qyzmetinde.
Onyń aıtýynsha, daǵdarysqa qarsy sharalar aıasynda shaǵyn jáne orta bızneske jan-jaqty qoldaý kórsetilýde. Atap aıtqanda, 20 myńnan astam sýbekt salyq alyp, nesıe boıynsha keıinge qaldyrý şaralarymen qamtyldy. Olardyń iskerlik belsendiligin qalpyna keltirý úshin eki baǵdarlama aıasynda 7 mlrd teńgeden astam qarajat bólindi.
«Bıznestiń jol kartasy» boıynsha 300 kásipkerge memlekettik qoldaý kórsetildi, «Eńbek» baǵdarlamasy boıynsha 800-den astam mıkrokredıt pen 700 óteýsiz grant berildi. Óńirlik bıznes «qarapaıym zattar ekonomıkasy» baǵdarlamasyna belsendi qatysady. Bıyl 15,2 mlrd teńgege 120 bıznes-joba qarjylandyryldy. Bul ótken jyldan úsh ese kóp. Jobalardy júzege asyrý qosymsha 1300 jańa jumys ornyn ashýǵa múmkindik beredi», - dedi Ermek Marjyqpaev.
Onyń sózine qaraǵanda, Jumyspen qamtý jol kartasyn iske asyrý barysynda jumysqa ornalasý múmkindigi paıda boldy, onyń aıasynda 9650 jumys orny quryldy. Eńbek naryǵynda baǵdarlamalardy iske asyrý esebinen barlyǵy 21 myńnan astam jumys orny quryldy, onyń ishinde 13 myńy turaqty.
