Aqmola oblysynda ınternatsıonalıst jaýyngerlerge eskertkish ornatyldy

KÓKShETAÝ. QazAqparat - El Táýelsizdiginiń 30 jyldyǵyn merekeleý aıasynda jáne Elorda kúni qarsańynda Sandyqtaý aýdanynda Aýǵanstanda áskerı boryshyn oryndaý kezinde soǵysqan jáne qaza tapqan ınternatsıonalıst jaýyngerlerge arnalǵan eskertkishtiń saltanatty ashylýy ótti, dep habarlaıdy aýdan ákimdiginiń baspasóz qyzmeti.

Aýdan ortalyǵy – Balkashın aýylynda ornatylǵan eskertkishtiń ashylýyna jınalǵandar otandastarymyzdyń áskerı erligine qurmet kórsetip, gúl shoqtaryn qoıdy.

«Sandyqtaý aýdanynan barlyǵy 85 adam shaqyryldy, onyń 5-ýi urys qımyldary kezinde qaza tapty, 5 jaýynger-ınternatsıonalıst «Qyzyl juldyz» ordenimen marapattaldy, onyń 4-ýi qaıtys bolǵannan keıin, «Erligi úshin» medalimen – 7 adam, «Jaýyngerlik eńbegi úshin» medalimen – 9 adam (onyń ishinde 2-i qaıtys bolǵannan keıin), «Mınany zalalsyzdandyrǵany úshin» medalimen-2 adam marapattaldy. Táýelsiz Qazaqstan Respýblıkasynda aýǵan soǵysyna qatysqan jaýyngerlerge qurmetpen qaraıdy, jan-jaqty qoldaý kórsetedi. Maıdan dalasynda qaza tapqan jaýyngerlerdiń erligi halyq jadynda máńgi saqtalady», - dep atap ótti aýdan ákimi Erbol Júsipbekov.

Eskertkishti «Aqmola oblysynyń aýǵan soǵysy ardagerleri odaǵy» qoǵamdyq birlestiginiń tóraǵasy Ybyraı Dýanbaı men Sandyqtaý aýdandyq aýǵan soǵysy ardagerleri odaǵynyń tóraǵasy Aleksandr Anatolevıch Sharypov ashty.

Osy rette, Dýanbaı Ybyraı barlyq jaýynger - ınternatsıonalıster atynan Sandyqtaý aýdany ákimi Erbol Júsipbekov pen eskertkishti ashýǵa úles qosqan azamattardy mereıtoılyq tós belgimen marapattady.