Aqmola oblysynda ınternatsıonalıst-jaýyngerler marapattaldy
KÓKShETAÝ. QazAqparat - Kókshetaý qalasynda Keńes áskeriniń Aýǵan jerinen shyǵarylǵanyna 30 jyl tolýyna baılanysty saltanatty shara ótti, dep habarlaıdy QazAqparat tilshisi.
Taǵylymdy shara ınternatsıonalıst-jaýyngerler saıabaǵyndaǵy eskertkishtiń mańyna gúl shoqtaryn qoıý rásimimen bastaldy. Odan ári shara Úkili Ybyraı atyndaǵy oblystyq fılarmonııada Aýǵan soǵysy ardagerleri men qaza bolǵan jaýyngerlerdiń týǵan-týystaryn marapattaý rásimimen jalǵasyn tapty.
Sharaǵa oblys ákiminiń orynbasary Aına Mysyrálimova, oblystyq qorǵanys isteri departamenti bastyǵynyń orynbasary Zańǵar Ǵabbasov, «Aýǵan soǵysynyń ardagerleri men múgedekteri odaǵy» qoǵamdyq birlestiginiń tóraǵasy Dýanbaı Ybyraı, Aýǵan soǵysyna qatysýshylar jáne áskerı-patrıottyq klýb pen jastar birlestiginiń ókilderi ınternatsıonalıst-jaýyngerler qatysty. Onda bir top Aýǵan soǵysynyń ardageri oblys ákimi orynbasarynyń Alǵys hatymen marapattaldy.
«Aýǵan soǵysy barlyǵymyzdyń júregimizge jazylmas jara saldy. Bul qaıǵyly, umytylmas oqıǵa qazaq halqynyń esinde máńgi qalary anyq. Osydan 30 jyl buryn 15 aqpan kúni Keńes áskerleriniń sońǵy shebi Aýǵan jerinen shyǵaryldy. Otan úshin ot keshken ardagerlerimizdiń erligi esh umytylmaıdy», dedi Aına Mysyrálimova.
Aqmola oblystyq qorǵanys isteri departamenti bastyǵynyń orynbasary Zańǵar Ǵabbasovtyń aıtýynsha, Aqmola óńirinen aýǵan jerine 1113 aqmolalyq attanyp, onyń 60-qa jýyǵy úıine oralǵan joq. Búgingi kúni óńirde 800-ge jýyq ardager-ınternatsıonalıst bar.
«On jylǵa sozylǵan soǵys talaı otbasynyń shańyraǵyn shaıqaltty. Qanshama jastyń júıkesi syr berip, ómirden baz keshti. Jat jerde júrý, adam tózgisiz qıyndyqtarmen betpe-bet kelýdiń azaby óz aldyna bir tarıh», dedi Aqmola oblysy boıynsha «Aýǵan soǵysy ardagerleri men múgedekteri qaýymdastyǵy» qoǵamdyq birlestiginiń tóraǵasy Dýanbaı Ybyraı.
Saltanatty shara jergilikti kórkemónerpazdardyń oryndaýyndaǵy kontserttik baǵdarlamaǵa ulasty.
