Aqmola oblysynda ınkassatorlardy tonady degen kúdikpen eki adam ustaldy
Oblystyq Polıtsııa departamenti baspasóz qyzmetiniń málimetinshe, bıylǵy jylǵy maýsymnyń 7-de saǵat 12:00 shamasynda Shortandy aýdanynyń Bozaıǵyr aýylynda tólemderdi qabyldaıtyn termınaldarǵa qyzmet kórsetetin eki ınkassatorǵa qaraqshylyq shabýyl jasalǵan.
«Aqmola oblysynda ınkassatorlarǵa qaraqshylyq shabýyl jasaǵan kúdiktiler - Qosshy qalasynyń 27 jáne 24 jastaǵy turǵyndary ustaldy. Anyqtalǵandaı, ınkassatorlar tólem qabyldaıtyn termınaldan aqsha sheship alǵan kezde, betterin medıtsınalyq maskamen tumshalaǵan belgisiz eki adam olardyń kóligine basa kóktep kirgen. Sondaı-aq, tapanshaǵa uqsas zatpen qorqytyp, aýyldyń shetine barýǵa májbúr etip, 14 mıllıon teńgeni alǵan soń taıyp turǵan», - dep habarlady vedomstvodan.
Qazirgi kezde, osyǵan baılanysty Qylmystyq kodekstiń 192-baby 4-bóligi 2-tarmaǵy «qaraqshylyq» boıynsha sotqa deıingi tergeý amaldary qolǵa alyndy. Qylmystyń ashylýyn polıtsııa departamentiniń bastyǵy D.Taev baqylaýyna alyp otyr.
«Tergeý amaldary barysynda kúdiktilerdiń osy ınkassatorlyq fırmada jumys istegeni belgili boldy. Olar urlanǵan aqshany Taıtóbe kentiniń aýmaǵynda «Nura» ózeniniń jaǵasyna jasyrǵan. Qazirgi ýaqytta tergeý is-sharalary jalǵasýda, basqa adamdardyń da osy qylmysqa qatystylyǵy pysyqtalýda. Kúdiktiler ýaqytsha ustaý ızolıatoryna qamaldy», -dep tolyqtyrdy vedomstvodan.
