Aqmola oblysynda inisin óltirgen kúdikti ustaldy
KÓKShETAÝ. QazAqparat- Aqmola oblysynda inisin óltirgen 36 jastaǵy er adam qamaýǵa alyndy, dep habarlaıdy «QazAqparat» HAA tilshisi.
Oblystyq ІІD baspasóz qyzmetiniń málimetine qaraǵanda, 2017 jylǵy 31 mamyrda Bulandy aýdandyq ІІB kezekshilik bólimine 1963 jylǵy Reseı Federatsııasynyń azamatshasy telefon arqyly habarlasyp, Makınsk qalasynda turatyn 35 jastaǵy jıeniniń iz-túzsiz joǵalǵandyǵyn aıtqan. Aryzdanýshynyń sózine qaraǵanda, jıeni 25-shi mamyrdan bastap baılanysqa shyqpaǵan.
«Atalǵan oqıǵaǵa baılanysty jedel-izdestirý toby joǵalǵan jigittiń 1981 jylǵy aǵasymen turǵan mekenjaıyna barady. Tekseris barysynda polıtsııa qyzmetkerleriniń birine úıdiń kilemshemen jabylǵan jertólesi kúdik týǵyzady. Polıtsııa qyzmetkeri osyǵan deıin oryn alǵan urlyqtardyń birin anyqtaý maqsatynda úı-úıdi aralap, tintý kezinde osy úıde de bolypty. Ol kezde atalmysh úıdegi jertóleniń beti kilemshemen jabylmaǵan. Qyraǵy tártip saqshysy osyny ańǵaryp qalǵan.
Jertóleni ashqan polıtseıler onda joǵalǵan er adamnyń múrdesin tapty. Kúdikti birden qylmysyn moıyndap, inisin spırttik ishimdiktiń saldarynan týyndaǵan aǵaıyndy ekeýara kıkiljinnen óltirgenin moıyndady.
Sonymen qatar, polıtseıler kúdiktiniń psıhıatr dárigerdiń esebinde turǵanyn anyqtady. Qazirgi kezde, kúdikti ustalyp ústinen QR QK 99-babynyń 1-bólimi (adam óltirý) boıynsha qylmystyq is qozǵaldy», - dep túsindirdi ІІD baspasóz qyzmetinen.
