Aqmola oblysynda geoaqparat portaly jobasy júzege asyrylýda
Aqmola oblysynyń geoaqparat portaly («Turǵyn úı qory» modýli) kóp kólemde geomálimetterdi jáne geoaqparattardy taldaýǵa, óńdeýge, saqtaýǵa, sondaı-aq, halyq sanaǵy boıynsha jumys isteýge arnalǵan. Ony ázirleý 2018 jyly bastaldy. Jobany júzege asyrý barysynda birneshe kózden tsıfrlyq jáne jazbasha túrinde málimet jınastyrylyp júıelendirildi.
«Naqtyly málimetterdi alý úshin biz eldimekenderdiń ákimderi men ýchaskelik polıtsııa ınspektorlaryna ótinishpen júgindik. Negizgi jumystardy aýdandyq sáýlet bólimderimen júrgizdik. Aýdan ortalyqtary men aýyldarda kóbine úılerdiń rettik sany men kósheleri qate kórsetilgen. Biz bul aqparattardy jańartyp, oblystyń barlyq eldimekenderi boıynsha vektorlyq karta jasadyq», - dep aıtty Geoportal qurastyrýshylary.
Mekeme mamandarynyń sózinshe, meken-jaılyq tizilimdegi málimetter qaıtadan salystyryldy. Jergilikti atqarýshy organdarmen áriptestiktiń arqasynda kartografııalyq materıal jańartyldy. Ár túrli málimetter konvertteý jáne qaıta tolyqtyrý arqyly biryńǵaı formatqa jınastyryldy, ǵarysh túsirilimi málimetterine saı eldimekenderdiń mekenjaılary ózgertilip, kartografııalyq materıaldar jańartylǵan.
«Málimetter bazasynda durys kórsetilmegen keıbir eldimekenderdiń, kóshelerdiń jáne úılerdiń ataýyn ózgertýdi esepke alýǵa kóp ýaqyt ketti. Kelesi kezekte, turǵyndardyń atalmysh eldimekenderge tirkelýin tekserdik. Bul málimetterdi jańartý úshin jergilikti polıtsııa qyzmetiniń kómegi qajet boldy. Geoaqparat portaly taldaý keńistigin avtomattandyrýǵa, óńirdiń eldimekenderi boıynsha málimetter alýǵa múmkindik beredi»,- dep tolyqtyrdy Geoportal qurastyrýshylary.
Sonymen birge, memlekettik organdarmen ózge de máseleler sheshilýde. Mysaly, tórtinshi deńgeıdegi bıýdjetti qalyptastyrý úshin jyljymaıtyn múliktiń qunyn baǵalaý kartasy, qurylys sanaty bar. Eń bastysy jobanyń aqparattyq qaýipsizdigine úlken mán berilýde.
