Aqmola oblysynda «Gazel» jyraǵa qulap, bir adam kóz jumdy

KÓKShETAÝ. QazAqparat – Aqmola oblysynda eki kólik soǵylyp, saldarynan bir adam kóz jumdy jáne taǵy eki adam aýrýhanaǵa tústi, dep habarlaıdy QazAqparat tilshisi polıtsııaǵa silteme jasap.

Jol apaty búgin «Ekaterınbor-Almaty» avtojolynyń 1105 shaqyrymynda Jaltyr aýylynyń mańynda bolǵan.

«Qostanaı oblysynyń 29 jastaǵy turǵyny basqarǵan «Gazel» avtokóligi joldyń qarsy baǵytyna shyǵyp ketip, «Maz» kóligimen soqtyǵysqan. Saldarynan «Gazel» joldyń shetindegi jyraǵa aýdaryldy, júrgizýshisi alǵan dene jaraqatynan sol jerde kóz jumdy. Al, «Maz» kóliginiń júrgizýshisi 52 jastaǵy qostanaılyq pen jolaýshysy Astrahan aýdandyq aýrýhanasyna jatqyzyldy», - dedi aýmaqtyq PB baspasóz qyzmeti.

Jol apatyna qatysty saraptama taǵaıyndaldy.