Aqmola oblysynda frı kartoby men bekire ýyldyryǵy óndiriledi
KÓKShETAÝ. QazAqparat - Aqmola oblysynda frı kartoby men bekire ýyldyryǵy óndiriledi, dep habarlaıdy QazAqparat tilshisi oblystyq kásipkerlik jáne ónerkásip basqarmasyna silteme jasap.
Vedomstvonyń málimetinshe, 2021 jyldyń segiz aıynyń qorytyndysy boıynsha Aqmola oblysynda ónerkásip óndirisiniń kólemi ken óndirý (102,7%) jáne óńdeý salalary (108,6%) esebinen 8,4% - ǵa ósti. Óńdeý ónerkásibi salalarynda – tamaq ónimderi (117,7%), sýsyndar (142,0%), hımııa (142,1%), rezeńke jáne plastmassa buıymdary (425,6%), mashına jasaý (147,5%) óndirisinde ósim saqtalyp otyr.
Óndiristi ártaraptandyrý boıynsha jumys sheńberinde 2020-2021 jyldary mashına jasaýda «Kazrost Injınırıng» ChK bazasynda YTO (ÝaıTıO) aýyl sharýashylyǵy traktorlary, «KAIK» JShS-de torum (Torým) joǵary ónimdi kombaındary, «Azam KS» JShS astyq keptirý keshenderi sııaqty tehnıkanyń jańa túrlerin shyǵarý bastaldy. Hımııa salasynda sýlfoammofos shyǵarýdy «Sareko» JShS Stepnogorsk qalasynda bastady. Qurylys ındýstrııasynda «Makınsk Jylý oqshaýlaý zaýyty» JShS-de mıneraldy maqta plıtalaryn, «Sapa sý» JShS-de úlken dıametrli temirbeton qubyrlardy shyǵarý jolǵa qoıylǵan.
«Jyl sońyna deıin oblys úshin ınnovatsııalyq ónimder - suly qaýyzy men frı kartobyn shyǵarýdy ıgerý josparlanyp otyr. Bolashaqta 2025 jylǵa deıin bekire ýyldyryǵy, forel jáne bekire tuqymdas balyq, shoshqa eti, temir men tehnıkalyq almazdar kontsentrattarynan jasalǵan armatýra men buryshtar óndirisin ıgerý josparda bar», - dedi vedomstvodan.
Aıtalyq, Aqmola oblysynyń shıkizattyq emes eksporty 2021 jyldyń qańtar-mamyr aılarynda 91,4 mln AQSh dollaryn nemese 2020 jyldyń sáıkes kezeńine 185,2% qurady. Ýran, alkogolsiz sýsyndar eksportynyń kólemi 10 ese, iri qara mal eti 2,9 ese, sút 1,7 ese ulǵaıdy. Oblysta óz ónimin 26 elge jetkizetin 50-den astam eksporttaýshy kompanııa jumys isteıdi, olardyń ishinde negizgi áriptesteri Reseı, Tájikstan, Ózbekstan, Qytaı, Aýǵanstan, Iran, Túrkııa bolyp tabylady. 2020 jyldan bastap eksporttyq jetkizilimder geografııasyn keńeıtý boıynsha jumystar sheńberinde «Astana-Agroprodýkt» JShS jáne «Samhat aıaq kıim fabrıkasy» JShS kásiporyndarymen jańa eksporttyq naryqtar ıgerildi. «Astana-Agroprodýkt» JShS jasalǵan kelisimshart aıasynda Qytaı Halyq Respýblıkasynyń naryǵyna 200 tonnadan astam et ónimin jetkizdi. «Samhat aıaq kıim fabrıkasy» JShS alǵash ret Reseı Federatsııasyna eki myńǵa jýyq jup bylǵary aıaq kıim jiberip, eksportqa shyqty.
