Aqmola oblysynda et óńdeý salasyn damytýǵa mán berilýde
KÓKShETAÝ. QazAqparat - Aqmola oblysynda et óńdeý salasy qarqyndy damýda. Bul týraly búgin oblys ákimi Sergeı Kýlagınniń tóraǵalyǵymen ótken ákimdiktiń májilisinde aıtyldy, dep habarlady oblys ákiminiń baspasóz qyzmetinen.
Májiliste baıandama jasaǵan oblys ákiminiń orynbasary D.Ádilbekovtiń aıtýynsha «100 naqty qadam» Ult josparyn júzege asyrý sheńberinde óńirde et óńdeý kesheńderin damytý boıynsha belsendi jumystar júrgizilýde.
«Úsh aýdanda túrli jobalar júzege asyrylýda. Aıtalyq, Býrabaı aýdanynda jyldyq qýaty - 1 500 tonna et óńdeıtin zaýyttyń qurylysy júrgizilýde. Bulandy aýdanynda broıler qus fabrıkasy, Shortandy aýdanynda 13 00 basqa arnalǵan shoshqa kesheni jáne jylyna 60 myń tonna qaz etin óndiretin ferma salynýda.
Shortandy aýdanynda 3 myń sıyrdan táýligine 120 myń lıtr sút alynyp, ony óńdeıtin kásiporyn ashylatyn bolady.
Oǵan qosa «Rodına» agrofırmasy saýyn sıyrlarynyń sanyn 2 000 basqa deıin arttyryp, sútti-taýaraly fermany keńeıtýdi kózdep otyr», dedi D.Ádilbekov óz sózinde.
