Aqmola oblysynda esirtki saýdasymen aınalysqan qylmystyq top ustaldy

KÓKShETAÝ. QazAqparat - Aqmola oblysynda esirtki saýdasymen aınalysqan qylmystyq top ustalyp, olardan 16 keliden astam esirtki zaty (gashısh) tárkilendi, dep habarlaıdy QazAqparat tilshisi oblystyq PD baspasóz qyzmetine silteme jasap.

«Aqmola oblystyq PD Esirtki qylmysyna qarsy is-qımyl jónindegi qyzmetkerleri júrgizgen jedel-izdestirý is-sharasy barysynda esirtki saýdasymen aınalysqan qylmystyq toptyń joly kesilip, 16 keliden astam esirtki zaty (gashısh) jáne 17 mıllıon 500 myń teńgeden astam aqsha tárkilendi. Úsh adamnan turtatyn qylmystyq top Nur-Sultan qalasy jáne elorda mańyndaǵy aýdandar aýmaǵyna asa iri mólsherde (gashısh) esirtki zatyn jetkizý, saqtaý jáne ótkizýmen aınalasyqan», - dedi vedomstvodan.

Qazirgi kezde osyǵan baılanysty Qylmystyq kodekstiń 297-babynyń 3-bóligi «asa iri mólsherde esirtki quraldaryn zańsyz saqtaý jáne ótkizý» boıynsha sotqa deıingi tergeý amaldary júrgizilýde.

«Kúdiktiler ýaqytsha ustaý oqshaýlaǵyshyna qamaldy. Ózge aqparat tergeý múddesi úshin jarııalanbaıdy», - dedi PD Esirtki qylmysyna qarsy is-qımyl jónindegi basqarmanyń bastyǵy, polıtsııa podpolkovnıgi Meıram Japbasov.