Aqmola oblysynda esirtki saýdasymen aınalysqan qylmystyq top quryqtaldy
KÓKShETAÝ. QazAqparat - Aqmola oblysynda esirtki saýdasymen aınalysqan qylmystyq top quryqtaldy, dep habarlaıdy "QazAqparat" HAA tilshisi oblystyq ІІD baspasóz qyzmetine silteme jasap.
Aǵymdaǵy jyldyń 28-shi maýsym kúni Aqkól aýdany aýmaǵynda júrgizilgen "Kóknər-2017" jedel aldyn alý sharasy barysynda ІІD Esirtki bıznesimen kúres jónindegi basqarmanyń qyzmetkerleri 30 jastaǵy əıeldi ustaǵan. Kelinshek esirtki saýdasymen aınalysqan qylmystyq topty basqarǵan.
Keıin anyqtalǵandaı kúdikti maýsym aıynyń basynda salmaǵy 1,9 gramm "geroın" satqan. Úıin tintý kezinde odan 16 gramm "geroın" jəne 182 myń teńge aqsha men ınektsııalyq shprıts tárkilendi.
Kelinshek esirtki bıznesin jalǵyz ózi dóńgeletpegen, buryn sotty bolǵan əri birge turatyn 1979 jylǵy er adamdy tartqan. Er adamnyń da salmaǵy 0,96 gramm geroın satqany əshkerlendi.
Jedel izdestirý sharasy barysynda kúdiktilerge esirtki jetkizip berýmen aınalysqan 29 jastaǵy Aqkól qalasynyń turǵyny da quryqtaldy.
Onyń úıinen de iri kólemde esirtki men aqsha jəne oq dəri tabylǵan. Qazirgi kezde, sot-krımınalıstıkalyq saraptama taǵaıyndaldy.
Polıtseıler qylmystyq top 6 adamnan turǵanyn anyqtap otyr. Qazirgi kezde top basshysynyń 26 jastaǵy sińilisiniń qylmysqa qatysy bary anyqtaldy. Oǵan qosa taǵy 2 adamnyń qylmysqa qatysy bar-joǵy tekserilýde.
"Qazirgi kezde basty kúdikti jəne onymen birge turǵan er adam men esirtki jetkizip berýshi ýaqytsha ustaý oqshaýlaǵyshyna toǵytylyp ústerinen QR QK 297-baby boıynsha qylmystyq is qozǵaldy", - dep kórsetilgen habarlamada.
